काठमाडौं । तेह्रथुम, बारा, रुपन्देही र मोरङमा भएको छुट्टाछुट्टै सवारी दुर्घटनामा पाँचजनाको मृत्यु भएको छ । 

तेह्रथुमको लालीगुराँस नगरपालिका–७ मा को.१ ख ५८२९ नम्बरको टिपर अनियन्त्रित भई दुर्घटना हुँदा दुईजनाको मृत्यु भएको छ ।

बुधबार दिउँसो सडकबाट करिब २५० मिटर तल खसेर दुर्घटना हुँदा टिपरमा सवार दुईजनाको मृत्यु भएको हो । मृत्यु हुनेहरूमा सिन्धुपाल्चोक बस्ने २४ वर्षीय साजु श्रेष्ठ र झापाको मेचीनगर नगरपालिका–१५ मेचीनगर बस्ने २३ वर्षीय सुगम चौधरी छन् । 

दुर्घटनामा गम्भीर घाइते भएका उनीहरूको प्राथमिक स्वास्थ्य चौकी वसन्तपुरमा उपचारको क्रममा मृत्यु भएको हो । साथै दुर्घटनामा घाइते भएका टिपरका चालकसहित तीनजनाको धरानमा उपचार भइरहेको जनाइएको छ । 

त्यस्तै, बाराको जीतपुरसिमरा उपमहानगरपालिका–२ मा ना.६ ख ८९३७ नम्बरको बसको ठक्करबाट पैदलयात्रीको मृत्यु भएको छ । परिचय नखुलेको अन्दाजी ३५ वर्षीय पुरूषको बुधबार बेलुकी मृत्यु भएको हो । दुर्घटनामा गम्भीर घाइते भएका उनको उपचारका लागि अस्पतालतर्फ लैजाने क्रममा बाटोमा नै मृत्यु भएको प्रहरीले जनाएको छ ।  

त्यसैगरी रूपन्देहीको मायादेवी गाउँपालिका–४, सेमरीमा लु.१ ख ६९६७ नम्बरको बसको ठक्करबाट भारतीय नागरिकको मृत्यु भएको छ । 

भारत बिहार घर भई बेथरी जगदम्बा धागो कारखानामा काम गरी बस्ने रमेशकुमार साहकी छोरी चार वर्षीया प्रियलकुमारी साहको बुधबार साँझ मृत्यु भएको हो । 

बसको ठक्करबाट गम्भीर घाइते भएकी उनको भीम अस्पताल भैरहवामा उपचारको क्रममा मृत्यु भएको हो । 

मोरङको सुन्दरहरैचा नगरपालिका–८, पाथिभरा मन्दिर नजिकै प्रदेश १–०१–००१ च ९६३२ नम्बरको स्कारपियो र प्रदेश १–०२–०४६ प २५२ नम्बरको मोटरसाइकल एक–आपसमा ठक्कर ठोक्किँदा युवकको मृत्यु भएको छ । 

गएराति दुर्घटना हुँदा मोटरसाइकल चालक बेलबारी नगरपालिका–२ बस्ने २२ वर्षीय रूपक घिमिरेको मृत्यु भएको छ । दुर्घटनामा गम्भीर घाइते भएका उनको कोशी अस्पताल विराटनगरमा उपचारको क्रममा मृत्यु भएको प्रहरीले जानकारी दिएको छ ।