काठमाडौं । सोमबार लन्डनमा भएको फिफा ‘द वेस्ट’ अवार्ड समारोहमा अर्जेन्टिनी कप्तान लियोनल मेसी वर्ष खेलाडी चुनिए । 

विश्व फुटबलको सर्वोच्च निकाय फिफाले प्रदान गर्ने यो अवार्ड तेस्रो पटक जित्ने क्रममा मेसीले म्यानचेस्टर सिटीका फरवार्ड एर्लिङ हाल्यान्ड र पेरिस सेन्ट जर्मन (पीएसजी)का काइलियन एमबाप्पेलाई पछि पारे । 

विश्वभरका राष्ट्रिय टिमका कप्तान, प्रशिक्षक सञ्चारमाध्यम र समर्थकको मतका आधारमा विजेता तय हुने यस अवार्डमा मेसी स्वयंले भने आफूलाई मत दिएनन् । ‘द वेस्ट’का लागि कुनै पनि देशको कप्तानले तीन खेलाडीलाई मत दिन पाउँछन् । जसमा पहिलोलाई पाँच, दोस्रोलाई तीन र तेस्रोलाई एक मत दिन पाइन्छ । यसमा मत दिने खेलाडीले आफैँलाई मत दिन पनि पाउँछन् । तर, मेसीले भने तीन मतमध्ये एक अंक पनि आफूलाई दिएनन् ।

मेसीले नर्वेका फरवार्ड हाल्यान्डलाई पाँच, फ्रेन्च स्टार एमबाप्पेलाई तीन र आफ्नै देशका सहकर्मी हुलियन आल्भारेजलाई एक अंक दिएका थिए ।

‘द वेस्ट’ का लागि मेसी र हाल्यान्डले समान ४८ स्कोर पाएका थिए । स्कोर बराबर भए पनि फिफाले राष्ट्रिय टिमका कप्तानले दिएको मतका आधारमा मेसीलाई विजेता चुनेको हो । मेसीले कप्तान र समर्थकबाट समान १३ अंक पाउँदा सञ्चारमाध्यम र प्रशिक्षकबाट समान ११ पाएका थिए । यता, दोस्रो स्थान हासिल गरेका हाल्यान्डले कप्तान र समर्थकबाट समान ११ अंक पाउँदा प्रशिक्षक र सञ्चारमाध्यमबाट १३–१३ अंक पाएका थिए ।

तेस्रो पटक अवार्ड जिते पनि समारोहमा भने मेसी उपस्थित थिएनन् ।