काठमाडौं । अमेजन, गुगल, डुओलिंगोलगायत विभिन्न प्रविधि कम्पनीले ठूलो संख्यामा कर्मचारी कटौती गरेका छन् । सन् २०२४ को सुरुआतसँगै लागत घटाउन यी कम्पनीले सयौँ कर्मचारी कटौती गरेका हुन् ।
कोभिड–१९ महामारीपछि २०२२ र २०२३ मा पनि विश्वभर व्यापक कर्मचारी कटौती गरिएको थियो ।
अमेजनको स्वामित्वमा रहेको लाइभ स्ट्रिमिङ साइट ट्विचका सीईओ ड्यान क्ल्यान्सीले गएको बुधबार ३५ प्रतिशत अर्थात् करिब ५०० कर्मचारी कटौती गर्ने घोषणा गरेका छन् ।
बुधबार नै अमेजनले आफ्नो प्राइम भिडियो र एमजीएम स्टुडियोमबाट सयौँ कर्मचारी कटौती गर्ने घोषणा गरेको छ ।
सोही दिन गुगलले पनि आफ्नो इन्जिनियरिङ र हार्डवेयर टिमबाट सयौँ कर्मचारी कटौतीको घोषणा गरेको छ ।
भाषा सिकाउने एप डुओलिंगोले समेत १० प्रतिशत कर्मचारी कटौतीको घोषणा गरेको छ ।
डिस्कर्डले गएको साता १७० कर्मचारी कटौती गरेको छ ।
भिडियो गेम सफ्टवेयर निर्माता युनिटी सफ्टवेयरले पनि एक हजार ८०० कर्मचारी कटौती गर्ने घोषणा गरेको छ । फोर्ब्सबाट ।
