काठमाडौं । राज्य व्यवस्था तथा सुशासन समितिमा संवैधानिक परिषद् (काम, कर्तव्य, अधिकार र कार्यविधि)सम्बन्धी ऐन, २०६६ लाई संशोधन गर्न बनेको विधेयकमाथि छलफल प्रारम्भ भएको छ । शुक्रबार सिंहदरबारमा प्रधानमन्त्री पुष्पकमल दाहाल ‘प्रचण्ड’को उपस्थितिमा प्रतिनिधिसभाअन्तर्गतको समितिमा सो विधेयकमाथि प्रारम्भिक छलफल सुरु गरिएको हो ।

बैठकमा प्रधानमन्त्री प्रचण्डले सो विधेयकमा सकेसम्म सर्वसम्मतिमा जोड दिइएको बताए । उनले संवैधानिक नियुक्तिमा विगतमा देखिएका बेथिति र समस्या निवारण गर्न संशोधन विधेयक ल्याइएको पनि बताए ।

आउँदो आइतबारदेखि राज्य व्यवस्था समितिमा विधेयकमाथि दफावार छलफल गरिनेछ । न्युज एजेन्सी नेपाल