विराटनगर । डेडिकेटेड र ट्रंक लाइन विद्युत् महसुलको विषयलाई लिएर कोसी प्रदेशका मुख्य औद्योगिक तथा व्यावसायिक संस्थाले सरकारको ध्यानाकर्षण गरेका छन् । 

नेपाल विद्युत् प्राधिकरणले उद्योगहरूको उत्पादन नै ठप्प हुनेगरी विद्युत् लाइन कटौती गर्दा त्यसको नकारात्मक असर पुगेको भन्दै औद्योगिक संस्थाले आफूहरूले गम्भीर ध्यानाकर्षण भएको जनाएका छन् । 

उद्योग संगठन मोरङ, नेपाल उद्योग परिसंघ कोसी र मोरङ व्यापार संघले संयुक्त विज्ञप्ति प्रकाशित गरी “उद्योगहरूमा विद्युत् आपूर्ति काटिँदा राष्ट्रिय तथा अन्तर्राष्ट्रिय लगानीकर्ताहरूमा कस्तो सन्देश जाला ? उत्पादन ठप्प हुदाँ रोजगारी, राजस्व तथा बैंक ब्याज भुक्तानी, बजार श्रृंखलालगायत क्षेत्रमा पर्ने प्रभावको जिम्मेवारी कसले लिने ?” भन्दै प्रश्न गरेका छन् । 

यतिका दिनसम्म औद्योगिक कलकारखाना बन्द भइ उत्पादन प्रभावित भइरहदा समेत सरकारले समस्याको गम्भीर्यतालाई आत्मसात गरी न्यायोचित समाधानका लागि अविलम्ब पहल गर्न माग गरिएको छ । उद्योग संगठन मोरङका अध्यक्ष राकेश सुरानाले वार्ताको माध्यमबाट समस्या समाधान गर्नुपर्ने पक्षमा आफूहरू रहेको बताए ।

“डेडिकेटेड र ट्रंकलाइन विद्युत् महसुलका सम्बन्धमा लामो समयदेखि नेपाल विद्युत् प्राधिकरण र प्रभावित उद्योगीहरूबीच हुँदै आएको रस्साकस्सी  र आ–आफ्नो अडानका कारण पेचिलो बनेको यो विषयलाई न्यायोचित समाधान खोजिनु पर्दछ भन्ने हाम्रो माग छ” विज्ञप्तिमा भनिएको छ ।

विद्युत् आपूर्ति कटौती गरी उद्योग कलकारखाना बन्द गर्दा सिर्जना हुने थप जटिलतालाई आत्मसात गर्दै हाल उद्योगहरूमा काटिएको विद्युत् आपूर्तिलाई अविलम्ब सूचारु गरी त्रिपक्षीय सरोकारवालाहरू, नेपाल सरकार, नेपाल विद्युत् प्राधिकरण र निजी क्षेत्र समेतको समन्वयमा विवादित विषयलाई न्यायोचित निरुपण गर्नुपर्ने भनिएको छ । 

“निजी क्षेत्रले समेत न्याय अनुभूति गर्नेगरी तत्काल ठोस कदम चाल्न नेपाल सरकार तथा सम्बन्ध सबै सरोकारवालाहरूमा जोडदार माग गर्दछौँ” विज्ञप्तिमा उल्लेख छ । 

विद्युत् महसुल नबुझाएको जनाउँदै प्राधिकरणले सुनसरी–मोरङ औद्योगिक करिडोरको रिलायन्स स्पिनिङ मिल्स र बाबा जुट मिल्सको लाइन काटिदिएको थियो ।