काठमाडौं । नेपालको अग्रणी डिजिटल भुक्तानी नेटवर्क फोनपे र एभरेस्ट बैंकबीचको सहकार्यमा ‘एभरेस्ट फोनपे क्रेडिट कार्ड’ सार्वजनिक गरिएको छ । यो सेवा हाल प्रयोगकर्ताहरूका लागि उपलब्ध गराइएको छ, जसअन्तर्गत प्रयोगकर्ताहरूले पूर्ण रूपमा भर्चुअल क्रेडिट कार्ड प्रयोग गरी डिजिटल भुक्तानी गर्न सक्नेछन् ।

नयाँ कार्ड सेवा एभरेस्ट बैंकको ‘इबीएल टच २४’ मोबाइल बैंकिङ एपमार्फत सजिलै प्रयोग गर्न सकिन्छ । प्रयोगकर्ताहरूले देशभर रहेका फोनपे क्यूआर व्यापारीहरूमा स्क्यान गरेर सरल रूपमा भुक्तानी गर्न सक्नेछन् ।

फोनपे क्रेडिट कार्ड योजनाअन्तर्गतको यो सेवा पारम्परिक क्रेडिट सुविधा जस्तै ब्याज छुट अवधिहरूसँगै अब क्यूआर आधारित कारोबार प्रणालीमा आधारित छ, जसले प्रयोगकर्तालाई डिजिटल युगको उपयुक्त सुविधा प्रदान गर्ने विश्वास लिइएको छ ।

“एभरेस्ट बैंक हाम्रो यात्रामा सहभागी भएपछि हामी अत्यन्त उत्साहित छौँ । यो सहकार्यले सुरक्षित, घरेलु र समावेशी क्रेडिट समाधानको खाँचोलाई सम्बोधन गर्छ,” फोनपेका प्रमुख कार्यकारी अधिकृत दिवसकुमार श्रेष्ठले भने, “हाम्रो उद्देश्य सबै नेपालीलाई लक्षित गर्दै सजिलो र समावेशी डिजिटल क्रेडिट अनुभव दिनु हो ।”

यो कार्ड सेवा फोनपे र सिटिजन्स बैंकसँगको सफल सहकार्यपछि सार्वजनिक गरिएको दोस्रो चरणको योजना हो । अब अन्य बैंकहरूले पनि चाँडै आफ्ना फोनपे क्रेडिट कार्ड योजना सार्वजनिक गर्ने तयारी गरिरहेका छन्, जसले समावेशी, नवप्रवर्तनशील र पहुँचयोग्य क्रेडिट सेवातर्फको यात्रा अझ बलियो बनाउने अपेक्षा गरिएको छ ।

फोनपेले यस सहकार्यमार्फत ‘डिजिटल नेपाल’ निर्माणको दिशामा निरन्तर अग्रसर हुँदै सुरक्षित, सहज र सबैका लागि पहुँचयोग्य वित्तीय सेवाहरूको विकास गरिरहेको छ ।