काठमाडौं । इंग्लिस प्रिमियर लिगमा फुलहमसँग २–१ ले पराजित भएपछि आर्सनलले शीर्ष स्थानमा उक्लिने अवसर गुमाएको छ । आइतबार राति क्राभेन कटेजमा भएको खेलमा घरेलु टिमलाई जित दिलाउन राउल जिमेनेज र बोबी डेकोर्डोभा–रेइडले गोल गरे । खेलमा सुरुआती अग्रता भने आर्सनलले बनाएको थियो । 

पाँचौं मिनेटमा बुकायो साकाले गोल गर्दै पाहुना टिमलाई अग्रतामा राखेका थिए । तर, आर्सनलको यो अग्रता लामो समयसम्म टिक्न सकेन । २९औं मिनेटमा जिमेनेजले गोल गर्दै घरेलु टिमलाई खेलमा फर्काए । 

५९औं मिनेटमा रेइडले गरेको गोल निर्णायक बनेपछि फुलहमले २–१ को जित सुनिश्चित गर्यो । 

जारी सिजनको लिगमा फुलहमको यो सातौं जित हो । २० खेलबाट २४ अंक जोडेको फुलहम तालिकाको १३औं स्थानमा छ । 

फुलहमसँगको हारले शीर्ष स्थानमा उक्लिने अवसर गुमाएको आर्सनल भने तालिकाको चौथो स्थानम झरेको छ । २० खेलबाट ४० अंक जोडेको आर्सनल शीर्ष स्थानको लिभरपुलभन्दा दुई अंकले पछि छ । तर, आर्सनलभन्दा एक खेल कम खेलेको लिभरपुल ४२ अंकसहित शीर्ष स्थानमा छ । 

लिगमा शनिबार नै भएको अर्को खेलमा टोटनहमले बर्नमाउथविरुद्ध ३–१ को सहज जित निकालेको छ । जितसँगै २० खेलबाट ३९ अंक जोडेको टोटनहम तालिकाको पाँचौं स्थानमा छ । १९ खेलबाट २५ अंक जोडेको बर्नमाउथ तालिकाको १२औं स्थानमा छ ।