काठमाडौं । प्रधानमन्त्री पुष्पकमल दाहाल ‘प्रचण्ड’ले राष्ट्रियताको सम्वर्द्धन र समुदायको पहिचानमा नै देशको एकता, स्वाधीनता र समृद्धि निर्भर हुने बताएका छन् । आइतबार काठमाडौंको टुँडिखेलमा आयोजित तमु ल्होसार महोत्सव–२०८० मा उनले यस्तो बताएका हुन् ।

उनले नेपालका मौलिक चाडपर्वले नेपालीका बीचमा सामाजिक एकता, सद्भाव, धार्मिक सहिष्णुता र राष्ट्रिय एकता मजबुत बनाउने बताए । देशको विशेषता र मौलिकताको आत्मसातीकरणसहित संघीय लोकतान्त्रिक गणतन्त्रको सौन्दर्यलाई स्थापित गर्नु सबैको साझा जिम्मेवारी भएको उनले उल्लेख गरे ।

प्रधानमन्त्री प्रचण्डले ल्होसारलगायत सबै सांस्कृतिक पर्वलाई राष्ट्रिय संस्कृतिका रूपमा प्रवर्द्धन गर्नुपर्नेमा जोड दिए । उनले विभिन्न जाति, समुदायका धार्मिक–सांस्कृतिक आस्थालाई सम्मान गर्दै सभ्यता, भाषा, कला, संस्कृति, वेशभूषा र सांस्कृतिक सम्पदाको संरक्षण हुँदै आएको पनि बताए ।

राष्ट्रिय एकतासहितको समृद्धिको लक्ष्य प्राप्त गर्नु राष्ट्रिय कार्यभार भएको पनि उनले बताए । उनले नेपाल पूर्व, पश्चिम, उत्तर र दक्षिणको प्रमुख सभ्यताको संगमस्थल भएको उल्लेख गरे ।

सबै जाति, जनजातिको आ–आफ्नो परम्परा, रीतिरिवाज र संस्कृति रहेको र त्यसको एकीकृत स्वरूप नै नेपालको राष्ट्रिय संस्कृति भएको उनले बताए ।

प्रधानमन्त्री प्रचण्डले टुँडिखेलमा तमु ल्होसार मनाएकालाई साँझमा कुनै अवरोध नगर्न सुरक्षा निकायलाई निर्देशन समेत दिए । उनले कार्यक्रमलाई सरकारले सहयोग गर्ने प्रतिबद्धता व्यक्त गरे । न्युज एजेन्सी नेपाल