काठमाडौं । सत्तासाझेदार दल नेकपा (एकीकृत समाजवादी)को केन्द्रीय कमिटी बैठकमा सुझावसहितको विधान संशोधन प्रस्ताव पेस गरिने भएको छ । शनिबार पार्टी केन्द्रीय कार्यालय आलोकनगरमा बसेको सचिवालय बैठकबाट यस्तो निर्णय गरिएको हो ।

विधान संशोधन प्रस्तावमाथि प्राप्त सुझाव र संशोधन समेत समावेश गरेर यही पुस ११, १२ र १३ गते बस्ने केन्द्रीय कमिटी बैठकमा पेस गर्ने निर्णय गरिएको प्रचार विभाग प्रमुख जगन्नाथ खतिवडाले जानकारी दिए ।

आउँदो जेठ ३ देखि ७ गतेसम्म काठमाडौंमा हुने पार्टीको महाधिवेशनका क्रममा विधान संशोधन गर्न संगठन विभाग प्रमुख बेदुराम भुसालको संयोजकत्वमा समिति गठन गरिएको थियो । समितिले तयार पारेको प्रस्ताव केन्द्रीय कमिटी, राष्ट्रिय सम्मेलन हुँदै महाधिवेशनमा पेस गर्ने तयारी छ ।

यस्तै, पुस ९ र १० गते बस्ने भनिएको स्थायी कमिटी र पोलिटब्युरो बैठक स्थगित गरिएको छ । उक्त बैठकलाई केन्द्रीय कमिटी बैठकमा नै समायोजन गर्ने निर्णय गरिएको उनले जानकारी दिए ।

विभिन्न प्रकारका नसर्ने रोगले आक्रान्त गराइरहेको अवस्थामा एकीकृत समाजवादीले पार्टीका नेता–कार्यकर्तालाई जीवनपर्यन्त गरिने अंगदान गर्न सावर्जनिक आह्वान गर्ने निर्णय गरिएको खतिवडाले बताए ।