विराटनगर । कोसी प्रदेश सभाका सांसदहरूले गाँजा खेती खुलाउनुपर्नेदेखि सरकारले नि:शुल्क औषधि वितरण गर्नुपर्नेसम्मका माग गरेका छन् । 

शुक्रबार बसेको बैठकमा एमाले सांसद कमला थापा मगरले झापाको बिर्तामोड मुक्ति चोकमा आकाशे पुल नभएर पटकपटक बाटो काट्ने बटुवाहरू दुर्घटनामा पर्ने गरेको बताइन् । “त्यहाँ आकाशे पुलको आवश्यकता छ । यसको अभावमा दुर्घटना हुँदा सर्वसाधारणले ज्यान गुमाउनुपरेको छ,” उनले भनिन् ।

उनले सरकारले दिने गरेको निःशुल्क औषधि सर्वसाधारणले सहजै नपाउने गरेको पनि बताइन् । त्यसैगरी कुरुवा महिलाका लागि अस्पतालमा स्तनपान कक्ष र बालबच्चाका लागि आराम कक्ष बनाउनुपर्ने भन्दै थापाले सरकारको ध्यानाकर्षण गराइन् । 

एमालेकै सांसद रमेशकुरमा बस्नेतले सरकारले अनुदान दिएका अस्पतालमा स्वास्थ्य बिमा कार्यक्रम लागु गरिए पनि सहजरूपमा औषधि नपाइने गरेको बताए ।

“ज्येष्ठ नागरिकमा पनि यो लागु छ । बीपी कोइराला स्वास्थ्य विज्ञान प्रतिष्ठानमा बिमा बन्द हुने अवस्था आएको भन्ने हल्ला चल्दा सेवाग्राही त्रासमा परेका छन् । व्यवस्थित गर्न जरुरी छ । सरकारले तोकेका औषधि जो बिमाको रकमबाट उपलब्ध गराइन्छ त्यो हुन सकेको छैन,” उनले भने ।

उनले बीपी कोइराला स्वास्थ्य विज्ञान प्रतिष्ठानले आफ्नो व्यवस्थापन आफैँ गर्ने प्रबन्ध भएको तर चिकित्सा शिक्षा आयोगले नियमन र मातहत राख्ने प्रयास गरेको बताए । भौतिक सुविधा र शिक्षक सेवा हुँदाहुँदै पनि पठनपाठन हुन नसकेको उनको भनाइ छ ।

एमाले सांसद रामदेव यादवले बर्जु गाउँपालिकाको रामजानकी मन्दिरको जग्गा व्यक्तिले हडपेको भन्ने विषयमा सत्यता नभएको दाबी गरे । “सत्यतथ्य छानबिन गर्दा त्यो विषयमा सत्यता छैन । ९ कठ्ठा ईश्वरी मायादेवीले मन्दिरलाई दान दिएको हो । गाउँपञ्चायतका बिहारी कामतसमेतको स्वीकृतिमा मन्दिरको जग्गा भेलिदेवी यादवलाई दिने र सट्टामा ९ कठ्ठा जग्गा मन्दिरको नाममा पास गरिदिने मालपोतको आलेख रहेको छ,” उनले भने, “स्रेस्ता प्रमाण कायम छ । कसैले हडपेको देखिएको छैन । मन्दिरको नाममै रहेको छ । मन्दिर बनेर पूजापाठ चलिरहेको छ । कसैले हकदाबीसमेत गरेको छैन ।” 

कांग्रेस सांसद विनोद राईले गाँजा खेती खुलाउनुपर्ने माग राखे । “कानुबाट बन्चित गरेर भन्दापनि खोलेर उत्पादन तथा बिक्री गर्न सकिने जनमाग रहेको छ । यसबाट कपडा तथा औषधिसमेत बन्ने भएकाले वैधानिक बाटो खोल्नुपर्छ,” उनले भने ।