काठमाडौं । कर्तव्य ज्यान मुद्दाका फरार व्यक्ति पक्राउ परेका छन् । अर्घाखाँचीको साविक सिमलपानी गाविस–५ घर भएका ३७ वर्षीय अंकित भन्ने जगत विकलाई घटनाको सात वर्षपछि प्रहरीले पक्राउ गरेको हो ।

विक समेतले २०७४ पुस ३० गते दिउँसो मकवानपुरको हाँडीखोला घर भएकी ५० वर्षीया अप्सरा भन्ने नारायणी तिमिल्सिनाको हत्या गरेका थिए ।

काठमाडौं महानगरपालिका–१४ भुवनेश्वरी मन्दिर परिसरभित्र हत्या गरी फरार रहेका उनलाई काठमाडौं उपत्यका अपराध अनुसन्धान कार्यालयबाट खटिएको प्रहरीले त्रिभुवन अन्तराष्ट्रिय विमानस्थलबाट पक्राउ गरेको हो ।

साथै सोही घटनामा संलग्न रहेका धादिङ साविक मूलपानी गाविस–७ घर भएका ४६ वर्षीय शिवराम अधिकारी नकबजनी चोरी मुद्दामा नाम परिवर्तन गरी अर्जुन अधिकारीको नाममा जेल सजाय भोगी रहेको खुल्न आएको छ ।

जगतलाई आवश्यक कारबाहीको लागि प्रहरी वृत्त कालीमाटी पठाइएको जनाइएको छ ।