काठमाडौं । ‘अन्डरवर्ल्ड डन’ दाउद इब्राहिमको मृत्यु भएको हल्ला निराधार भएको र उनी शतप्रतिशत ‘फिट’ रहेको उनका निकट सहयोगी छोटा शकीलले बताएका छन् । विभिन्न भारतीय सञ्चारमाध्यमले विष सेवनपछि उनी पाकिस्तानको कराँचीस्थित अस्पतालमा भर्ना भएको समाचार लेखेका थिए ।

• ‘अन्डरवर्ल्ड डन’ दाउद इब्राहिम ‘कराँचीको अस्पतालमा भर्ना’ 

सोमबार शकीलले दाउद इब्राहिमको मृत्युको हल्ला अफवाह भएको बताएका हुन् । दाउदको आपराधिक संस्था डी–कम्पनीको विश्वव्यापी ‘अपरेसन’ हेर्ने शकीलले पाकिस्तानमा उनलाई सकुशल अवस्थामै भेटेको बताएको टाइम्स अफ इन्डियाले उल्लेख गरेको छ ।

दाउद इब्राहिम बिरामी भएर अस्पताल भर्ना भएको भनेर ट्विट गरेको भनिएको पाकिस्तानका कार्यकारी प्रधानमन्त्रीको ट्विटर अकाउन्ट पनि ‘फेक’ रहेको बताइएको छ ।

यसैबीच, पाकिस्तानी क्रिकेट लेजेन्ड एवं अन्डरवर्ल्ड डनका नजिकका नातेदार मानिएका जावेद मियाँदादलाई नजरबन्दमा राखिएको समाचार सार्वजनिक भएको छ ।

सन् १९९३ को मुम्बई विस्फोटका ‘मास्टरमाइन्ड’ दाउदलाई पाकिस्तानले आश्रय दिएको भारतको आरोप छ । तर, पाकिस्तानले उनलाई शरण दिएको दाबी अस्वीकार गर्दै आएको छ ।

भारतीय गुप्तचर संस्थाले कराँचीको माथिल्लो क्लिफ्टन क्षेत्रमा उनी र उनका सहयोगी शकील रहेको जनाएको थियो । पछिल्लोपटक दाउदको मृत्यु भएको हल्लामा पाकिस्तानी अधिकारीले कुनै प्रतिक्रिया नजनाएको भारतीय सञ्चारमाध्यमले उल्लेख गरेका छन् ।