विराटनगर । नेकपा (एमाले)का महासचिव शंकर पोखरेलले मध्यपहाडी (पुष्पलाल लोकमार्ग) भएर गरिएको पार्टीको संकल्पयात्राले विकासको सम्भावना र आवश्यकतालाई नजिकबाट बुझ्ने मौका मिलेको बताएका छन् ।

मंगलबार बिहान विराटनगरमा आयोजित पत्रकार सम्मेलनमा उनले अभियान पूर्णतः सफल भएको जिकिर गरे । पोखरेलले भने, “मध्यपहाडी लोकमार्गले छोएका मात्र नभई आपासको यथार्थ जानकारी भएको छ । अब त्यहाँ के कसरी राज्यले समस्या र सम्भावना पहिल्याउने भन्ने पनि बुझिएको छ ।”

पुष्पलाल राजमार्ग एमाले नेतृत्वको सरकारको पालमा सुरु गरिएको महत्त्वपूर्ण योजना भएको उनले उल्लेख गरे । अहिले त्यसलाई छोट्ट्याउनुपर्ने प्राविधिकबाट सुझाव प्राप्त भएको उनले जानकारी दिए ।

उनले भने, “यो यात्राले पहाडी क्षेत्रको सांस्कृतिक, सामाजिक र अर्थराजनीति बुझ्न अवसर मिल्यो ।”

मध्यपहाडी क्षेत्रमा स्मार्ट सिटी बनाउन गरिएका योजना अलपत्र रहेको भन्दै उनले यसलाई गुलजार बनाइनुपर्नेमा जोड दिए । कृषि र पर्यटनबाट समेत सुस्ताएको यो क्षेत्रमा नयाँ ऊर्जा थप्न सकिने उनले बताए ।

एमालेको अभियानलाई पहिचानको नाम दिएर विरोध गरिएको स्वर सुनिए पनि त्यो जनताको तहमा नभएको उनको भनाइ थियो । “त्यो एमालेकेन्द्रित विरोध थियो । तर, जनताको तहमा थिएन ।”

उनले पार्टी अध्यक्ष केपी शर्मा ओलीमाथि गलत व्यवहार गर्न खोजिएको विषयमा सञ्चारमाध्यमले गलत ढंगले समाचार पस्किएको आरोप लगाए । महासचिव पोखरेलले प्रदेशको नाम कोसी नै जायज भएको टिप्पणी गरे ।