काठमाडौं । सर्वोच्च अदालतका प्रस्तावित न्यायाधीश बालकृष्ण ढकालको संसदीय सुनुवाइ भएको छ । वरिष्ठ अधिवक्ताबाट न्यायाधीशमा सिफारिस भएका ढकालले सोमबार संसदीय सुनुवाइ समितिमा आफ्नो अवधारणा राखिसकेपछि सांसदहरूले प्रश्न सोधे ।

• न्यायपालिकालाई निश्चित बजेट सुनिश्चित हुनुपर्छ : प्रस्तावित न्यायाधीश (पूर्णपाठ)

सांसदहरूले न्यायाधीशको आचरण, न्यायालयप्रतिको आस्था बढाउन न्यायाधीशको भूमिकासहित उनलाई व्यक्तिगत प्रश्न समेत गरे ।

सांसदले गरेका प्रश्न पढ्नोस्– 

महेश बर्तौला 
कानुनानुसार अघि बढ्दा सामाजिक न्याय मर्ने अवस्था छ, विकास निमार्णको कार्य रोकिने अवस्था रहन सक्छ । यसमा तपाईंको कस्तो दृष्टिकोण रहन्छ ? 

रमेशजंग रायमाझी 
– बारबाट आउनुभएको हो । बारले न्यायाधीशको अवधि सात वर्ष हुनुपर्छ भनिरहेको छ । यो उपयुक्त हो कि हैन ? राज्यले भार व्यहोर्न सक्छ ?
– न्यायायको काम फैसला गर्ने मात्र हो कि कार्यान्वयन पनि हुन्छ ? 

जीवन परियार 
– निष्पक्ष न्याय दिने मुख्य कुरा हो । न्यायालयबाट न्याय प्राप्त भएन भन्ने गुनासो छ । यसलाई कसरी समाधान गर्ने ?
– नेपाल बहुआयामिक देश छ । सबै जातजाति, पेसा, धर्म, व्यवसायीले न्यायालयमाथि कसरी भरोसा गर्लान् ?

देवेन्द्र दाहाल
– न्याय माग्ने क्षेत्रबाट न्याय दिने क्षेत्रमा जाँदै हुनुहुन्छ । सिंगो न्यायप्रणाली सुधार गर्नका लागि कुन–कुन चिज बाधक छन्, कुन सहज छन् ? 

डोलप्रसाद अर्याल 
– बिनापक्राउपुर्जी समाउने, पहुँचको आधारमा हत्कडी लगाइदिने र सामाजिक जीवन असर गर्ने र साना व्यवसाय गर्न बाधक परेको हुनसक्छ । यसमा के छ योजना ? 

पदम गिरी 
– नेपालको न्यायालयमा जनविश्वास घटेको छ, वितृष्णामा रूपान्तरण हुँदै छ भनिन्छ । कसरी विश्वास जगाउन योगदान दिनुहुन्छ ? 
– छोटो समयमा न्यायसम्पादन गराउन कस्तो भूमिका खेल्नुहुन्छ ? 
– सर्वोच्चमा युवापुस्ता, ३०÷३५ का युवाहरू प्रवेश गराउने वातावरण बनाउन सक्नुहुन्छ भन्ने लाग्छ कि लाग्दैन ?

ईश्वरी न्यौपाने 
– तपाईंको विरुद्ध उजुरी आएको छैन । निमुखा जनताले न्याय कसरी पाउँछन् ? त्यो वर्गले न्याय नपाएको अवस्था छ । 
– जनताको विश्वास गुमेको भनिन्छ । न्याय महँगो छ भनिन्छ । यसमा कसरी काम गर्नुहुन्छ, के छ योजना ? 

जर्नादन शर्मा 
– पक्षको भूमिकाबाट निष्पक्षतामा जाँदै हुनुहुन्छ । यसलाई कसरी सन्तुलन गर्नुहुन्छ ? 
– बार र न्यायालयको अन्तरसम्बन्ध छ । एकले अर्कालाई हेर्दा कहिले मित्र र कहिले तिक्तता देख्छौँ । यसमा कसरी अन्तरसम्बन्ध मिल्छ ? 
– यो एक राजनीतिक अंग हो । सम्पूर्ण रूपमा मुक्त राख्न सकिँदैन । किनभने, राज्य राजनीतिको उच्च हो । न्यायालय राज्यको मुख्य अंग हो । यसलाई कसरी हेर्नुहुन्छ ?