काठमाडौं । काठमाडौंको बालाजुस्थित ढुंगेधारामा ट्रकको ठक्करबाट एकजना यात्रुको मृत्यु भएको विषयमा पीडित परिवार र यातायात व्यवसायी कम्पनीका प्रतिनिधिबीच भएको विवादबारे नेपाल यातायात व्यवसायी राष्ट्रिय महासंघले आपत्ति जनाएको छ ।

नारायणी यातायात व्यवसायी कम्पनी प्रालिले सञ्चालन गरेको ना.८ ख ३५०१ नम्बरको ट्रकले गएको बुधबार बालाजुको ढुंगेधारामा स्कुटरलाई ठक्कर दिँदा रसुवाका विशाल लामाको मृत्यु भएको थियो ।

दुर्घटनापछि प्रहरीले नारायणी यातायात व्यवसायी कम्पनीका प्रतिनिधिलाई बोलाएको थियो । छलफलका लागि नारायणी यातायात व्यवसायीको प्रतिनिधिका रूपमा रमेश कार्की पुगेका थिए ।

तर, उनीमाथि मृतक पक्षले अचानक सांघातिक आक्रमण गरेर सख्त घाइते बनाएको महासंघको आरोप छ । महासंघले कार्कीको उपचार गर्न तथा कुटपिटमा संलग्नलाई कारबाही गर्न माग गरेको छ ।

"...छलफल गर्न जाने प्रतिनिधिको शान्ति सुरक्षा दिने निकायभित्र नै आक्रमण हुनु निन्दनीय छ । अतः शान्ति सुरक्षा दिने निकाय नै मूकदर्शक भएर बस्दा यस्ता भवितव्यवश हुने कैयौँ दुर्घटनाको छलफलमा जाने व्यक्ति असुरक्षित हुने र नेपाल सरकारले शान्ति सुरक्षासमेत दिन नसक्दा शान्ति सुरक्षामा समेत प्रत्यक्ष असर पुग्न जाने भएकाले उक्त घटनाबाट घाइते भएका रमेश कार्कीको औषधी उपचार र सांघातिक आक्रमण गर्ने व्यक्तिलाई तत्काल कानुनी कारबाही गरी कानुनी राज्यको महसुस गराउन नेपाल सरकारसँग अनुरोध छ," विज्ञप्तिमा भनिएको छ ।