काठमाडौं । चोभार सुक्खा बन्दरगाह सञ्चालनका निम्ति इन्टरमोडल यातायात विकास समिति र ट्रान्स नेपाल टीआरएस लोजिपार्क प्रालिबीच सम्झौता भएको छ ।

सोमबार समिति र प्रालिका अधिकारीबीच पाँच वर्षका निम्ति दुई करोड ८८ लाख रुपैयाँ रकम न्यूनतम सट्टापट्टा बहाल र नियमानुसार महसुल बाँडफाँट गर्ने गरी सम्झौतापत्रमा हस्ताक्षर भएको हो । करार सम्झौतापत्रमा समितिका निर्देशक युवक डंगोल र सञ्चालक कम्पनीका तर्फबाट प्रबन्ध निर्देशक मुकेशकुमार राठीले हस्ताक्षर गरेका छन् ।

हस्ताक्षरपछि सञ्चारकर्मीसँग समितिका कार्यकारी निर्देशक आशीष गजुरेलले चोभार सुक्खा बन्दरगाह सञ्चालनको करिब २० महिनाको अवधिमा व्यापारिक प्रयोगमा वृद्धि भइरहेको बताए ।

प्रबन्ध निर्देशक राठीले बन्दरगाह सञ्चालनमा केही चुनौती रहे पनि त्यसलाई मध्यनजर गरी गृहकार्य सुरु गरिसकेको बताए । उनले आफूहरूले दिने सेवा स्तरीय बनाउन प्रयास गर्ने उल्लेख गरे ।

समितिले गएको साउन ९ गते टेन्डर आह्वान गरेको थियो । ट्रान्स नेपाल र न्यु नेपाल ढुवानी सेवाले आवेदन दिएका थिए । समितिले प्राविधिक मूल्यांकनमार्फत ट्रान्स नेपाललाई बन्दरगाह सञ्चालनको अनुमति दिएको जनाइएको छ । न्युज एजेन्सी नेपाल