काठमाडौं । गैरआवासीय नेपाली संघ (एनआरएनए)को गत महिनामा भएको निर्वाचनमा धाँधली भएको भन्दै संघको समानान्तर समितिले पुनः निर्वाचन गराउन माग गरेको छ । धाँधली भएको प्रमाणहरू प्राप्त भएको भन्दै उक्त निर्वाचन रद्द गरी पुनः निर्वाचन गराउन माग गरेको हो । 

मंगलबार काठमाडौंमा आयोजित पत्रकार सम्मेलनमा बोल्दै समानान्तर समितिका अध्यक्ष राजेन्द्रकुमार शर्मा (आरके)ले गत २९ अक्टोबर २०२३ मा अनलाइन प्रणालीबाट गराइएको निर्वाचनमा धाँधली भएको प्रमाण पाएको बताए । 

संघले विज्ञप्ति जारी गर्दै उपाध्यक्षका उमेदवार केशव पौडेलको नेपालबाट खसेको मत शून्य देखिएको छ । यस सम्बन्धमा पहिलो स्पष्टीकरणमा ग्लोबल र लोकल मतपत्रमा नाम फरक भएको भनिएता पनि पछि मतपत्र चेक गर्दा नाममा फरक नभएको देखिएको बताइएको छ । स्पष्टीकरणले सिस्टमप्रति नै झन् गम्भीर आशंका पैदा गरेको विज्ञप्तिमा भनिएको छ । 

सिस्टमको फिचरअनुसार सबै पदाधिकारीको मत संख्या अनिवार्य बराबर हुनुपर्नेमा फरक फरक भएको बताइएको छ । 

“संसारभर रहेका लाखौँ गैरआवासीय नेपालीहरूको भावनासँग जोडिएको यस्तो महत्वपूर्ण विषयमा सत्य, तथ्य छानबिन गरी निर्वाचनमा योजनाबद्ध धाँधली गर्ने तथा संस्था कब्जा गर्न खोज्ने समूहविरुद्ध कडा कारबाही गर्न माग गर्दछौँ । त्यस्तै, महाधिवेशनको म्यान्डेट नपाएको अवैध समितिले संघको कोषबाट एकलौटी रूपमा अपचलन गर्ने तथा सचिवालयको दुरुपयोग गर्ने काम मान्य छैन । त्यस्तो काम तुरुन्त बन्द गर्न माग गर्दछौँ,” शर्माले भने ।