काठमाडौं । प्यालेस्टाइनी लडाकु समूह हमास र इजरायलबीच बन्दी रिहा गर्न गरिएको चारदिने युद्धविराम अन्तिम दिनमा पुगेको छ ।

युद्धविरामको पहिलो तीन दिनमा हमासले ५८ बन्धक (विशेष गरी बालबालिका र महिला) रिहा गरेको छ । इजरायलले ११७ प्यालेस्टाइनी बन्दी रिहा गरेको सीएनएनले उल्लेख गरेको छ ।

अमेरिकी राष्ट्रपति जो बाइडेनले आफूहरूले युद्ध अझै केही दिन रोक्न र थप बन्धक रिहा गर्न पहल गरिरहेको बताएका छन् ।

हमास र इजरायल दुवै पक्षले युद्धविराम लम्ब्याउन सकिने सम्भावनाबारे छलफल गरेका छन् ।

सुरुमा गरिएको युद्धविराम सम्झौताको सर्तअनुसार युद्ध रोक्न हमासले प्रत्येक दिन थप १० बन्धक रिहा गर्न आवश्यक छ ।

अमेरिका र कतारको मध्यस्थतामा गरिएको युद्धविरामलाई लम्ब्याउन हमास इच्छुक रहेको बताइएको छ ।

इजरायलको ‘युद्ध मन्त्रिपरिषद्’ले यसका निम्ति प्रारम्भिक सर्त परिवर्तन नहुने जनाएको छ ।

हमासले सोमबार रिहा गर्ने अपेक्षा गरिएका बन्धकको सूची इजरायललाई पठाएको छ । इजरायली प्रधानमन्त्रीको कार्यालयले उक्त सूची प्राप्त गरेको जनाएको छ ।