सर्त 
मेरा यी हात चाहिन्छ ?
लग !
यी दुई खुट्टा चाहिन्छ ?
यी पनि लग !
अँध्यारोलाई परास्त गर्दै 
चम्किलो उज्यालो हेर्ने
यी दुई आँखा चाहिन्छ भने पनि 
निसंकोच लग !

विचारको सर्वशक्तिमान हतियार छ 
मसँग 
त्यो पनि दिन्छु 
लग !

म पूर्ण रूपमा सकिन तयार छु
केके माग्नु छ 
माग !

सर्त !
मसँगबाट 
तिमीले लगेका सबै चिजहरू 
मात्र उज्यालोका निम्ति प्रयोग गर्नुपर्नेछ ।

०००

विभेद
दैलोमा 
हरेक बिहान
फूलपाती अनि घडा राखेर
घामको अनुष्ठान गरिरह्यौँ
उसैगरी हरेक साँझ 
घरको संघारमा दियोबत्ती बालेर 
जूनको आराधना गरिरह्यौँ 
पुस्तौँदेखि 
हाम्रो घरमा न जून आयो 
न त घाम नै आयो 

हरक्षण आइरहने अँध्यारोसँग
हाम्रो सम्बन्ध यस्तो बनेछ कि 
हामी आफैँ अँध्यारो बनेछौँ 

आजकाल 
हामी घरबाहिर निस्किँदा 
घामजून अनि छिमेकी
हामीसँग डराउँछन् !

०००

नियति 
हिजो मात्रै, 
यो राज्यले बाँच्न दियो भने 
तपाईंको आयु शतक छ 
भनेर मेरो आयुको भविष्यवाणी गर्ने 
युवा ज्योतिषीले 
आज आत्महत्या गरेछन् 

उनले आफ्नो भविष्य जानेनन् कि 
मेरो आयुका लागि आत्महत्या गरे 
अथवा यो राज्यले उनलाई 
पूरा आयु बाँच्न दिएन 
म अनौठो सोचमा छु !

०००

आँसुको बाढी 
तिमीले हाँस्न भन्यौ,
आधा हाँसो तिम्रो ओठमा 
आधा हाँसो मेरो ओठमा राखेर 
म खुब हाँसे 

तर, आँखाबाट झरेको बाढीले 
कहिल्यै नखोलिने गरी 
मेरा आँखा,
कहिल्यै नचल्ने गरी 
मेरा मनमुटु, 
अनि कहिल्यै नहाँस्ने गरी 
मेरा ओठ डुबेछन् !

म हाँस्दा, 
तिमीले म मरेकोे देख्यौै ?

साँच्चै भन न,
मेरो खुसीमा आँसुको बाढी किन पस्छ ?