जुम्रा, उपियाँ र उडुस

साहित्य

जुम्रा, उपियाँ र उडुस

शनिबार, चैत १६, २०८१

सरकार,
तपाईंको शिरमा बस्न चाहन्छु
तपाईंको कपाल बाक्लो छ
म जुम्रा हुँ
तपाईंको शिरमा सुरक्षित हुन्छु
सरकारको शिरमा
हात लगाउने कसको हिम्मत !

सरकार,
तपाईंको ओछ्यानमा बस्न चाहन्छु
सरकारजस्तै
ओछ्यान पनि मोटो छ
म उडुस हुँ
रगत खाँदै
सरकार र ओछ्यानजस्तै मोटाउन चाहन्छु
सरकारको ओछ्यानमा पुग्ने कसको तागत !

सरकार,
तपाईंको शरीरमा
म रहन चाहन्छु
हृष्टपुष्ट सरकारको शरीरमा
म उपियाँ रगत खाँदै गर्दा
मेरो जीवन दीर्घ हुन्छ
सरकारको
शरीरमा स्पर्श गर्ने, छुने कसको आँट !

सरकार,
तपाईं भन्नुहोला–
म शासक हुँ
जनताको
टाउकोमा बस्
टाउको खुइलिइसकेको छ
जनताको ओछ्यानमा बस्
सडक ओछ्यान भएको छ
र जनताकै शरीरमा बस्
शरीर
अस्थिपञ्जर भएको छ
सरकारकै
आदेशमा जनताको
टाउकोमा बसेँ
ओछ्यानमा बसेँ
र शरीरमा बसेँ
उनीहरूसँग अब रगत छैन
म रगतविना बाँच्न सक्दिनँ !
आदेश तामिल गर्ने
आज्ञाकारी दास हुँ