काठमाडौं । इजरायल र हमासले बुधबार गाजामा युद्धविरामका निम्ति कतारको मध्यस्थता प्रस्तावमा सहमति गरेको पुष्टि गरेका छन् ।

हमासले बन्धकलाई रिहा गर्ने सर्तमा इजरायली पक्ष प्यालेस्टाइनी बन्दीलाई रिहा गर्न र घेरामा परेको एन्क्लेभमा थप मानवीय सहायता प्रवेशको अनुमति दिन सहमत भएको इजरायली सरकारले एक विज्ञप्तिमा जनाएको छ ।

इजरायलका प्रधानमन्त्री बेन्जामिन नेतान्याहूको कार्यालयबाट जारी विज्ञप्तिअनुसार त्यहाँका जेलबाट करिब १५० महिला र किशोर प्यालेस्टाइनी बन्दीलाई रिहा गर्नुपर्ने सम्झौता छ । सम्झौताअनुसार हमासले कम्तीमा ५० बन्धक रिहा गर्नुपर्ने बताइएको छ ।

बन्धकलाई चार दिनको अवधिमा सानो समूहमा रिहा गरिनेछ । इजरायलले थप बालबालिकालाई मुक्त गर्न दबाब दिइरहेको छ ।

हमासद्वारा रिहा गरिने प्रत्येक थप १० बन्धकका निम्ति युद्धविराम अर्को एक दिन लम्ब्याइनेछ ।

हमासले घेराबन्दीमा रहेको तटीय इलाकामा ४६ दिनको रक्तपातपूर्ण द्वन्द्वपछि कतारी–इजिप्टियन मध्यस्थतामा बुधबार इजरायलसँग चारदिने युद्धविराम सम्झौताको पुष्टि गरेको छ । सिन्ह्वा/न्युज एजेन्सी नेपाल