काठमाडौं । टिकटक प्रयोगमा प्रतिबन्ध लगाउने सरकारको निर्णय अझै पूर्णरूपमा कार्यान्वयनमा आउन सकेको छैन । अधिकांश प्रयोगकर्ताले निर्वाधरूपमा टिकटक चलाइरहेका छन् । तर, एनटीसी र एनसेलले टिकटक प्रयोगमा रोक लगाइसकेका छन् ।

नेपाल दूरसञ्चार प्राधिकरणका अध्यक्ष पुरुषोत्तम खनाल भने आजै टिकटक पूर्णरूपमा बन्द भइसक्ने बताउँछन् ।

"भायानेटको बन्द भइसक्यो । वर्ल्डलिङ्क र सुबिसुको केही समयमै बन्द हुँदै छ । उनीहरूले काम गरिरहेका छन् । आजै सबैतिर पक्का बन्द भइसक्छ," बाह्रखरीसँग खनालले भने ।

सरकारले सोमबारमात्रै टिकटक प्रयोगमा प्रतिबन्ध लगाउने निर्णय गरेको थियो । मन्त्रिपरिषद्को बैठकले निर्णय गरेलगत्तै सञ्चार तथा सूचनाप्रविधि मन्त्रालयले नेपाल दूरसञ्चार प्राधिकरणलाई पत्र लेखेर सरकारको निर्णय कार्यान्वयन गर्न निर्देशन दिएको थियो । प्राधिकरणले इन्टरनेट सेवा प्रदायकलाई पत्राचार गरेर टिकटक बन्द गर्न भनेको थियो ।