काठमाडौं । नेपाल दूरसञ्चार प्राधिकरणले टिकटक बन्द गर्न इन्टरनेट सेवा प्रदायक संस्थाहरूलाई पत्र पठाएको छ । मन्त्रिपरिषद्को निर्णयपछि प्राधिकरणले सेवा प्रदायक कम्पनीहरूलाई नेपालमा टिकटक नचल्ने बनाउन पत्राचार गरेको प्राधिकरणका सहायक प्रवक्ता अच्युतानन्द मिश्रले जानकारी दिए ।
प्राधिकरणकै अध्यक्ष पुरुषोत्तम खनालले भने टिकटक आजै बन्द भइसक्ने बताए । उनले अहिले सेवा प्रदायकले काम गरिरहेकाले अबको केही समयमै टिकटक नचल्ने बताए ।
"हामीले सेवा प्रदायक कम्पनीहरूलाई खबर गरिसकेका छौँ । एनसेल र एनटीसीलाई पनि भनिसकेका छौँ । उहाँहरूले काम गर्दै हुनुहुन्छ । एक–डेढ घण्टाभित्र काम भइसक्छ होला । आजै बन्द हुन्छ," बाह्रखरीसँग खनालले भने ।
सरकारले सोमबार मात्र टिकटक प्रयोगमा प्रतिबन्ध लगाउने निर्णय गरेको थियो ।
सेवा प्रदायकहरूले वेबसाइट र एपमा पहुँच रोकेसँगै टिकटकको एप र वेब दुवै खुल्ने छैनन् । नेपालमा लाखौँको संख्यामा टिकटकका प्रयोगकर्ता छन् ।
-1706524096.JPG)
