काठमाडौं । काठमाडौं महानगरपालिकाले तोकेको स्टलबाट फूल बिक्री नभएको भन्दै व्यापारीहरूले दुखेको पोखेका छन् । काठमाडौं महानगरपालिकाले काठमाडौंको भृकुटीमण्डप, एयरपोर्ट–तीनकुने, हाँडी गाउँ र बालाजु भ्याली कोल्ड स्टोर छेउमा फूल बिक्रीका लागि स्थान तोकेको छ ।

तर, ती स्थानमा फूल बिक्री गरिरहेका किसानहरूले समयमै प्रचारप्रसार हुन नसक्दा फूल बिक्रीमा गिरावट आएको बताएका छन् । फूल व्यापारीहरूले निश्चित ठाउँ तोकेर बिक्री गर्नु राम्रो भए पनि ठाउँबारे समयमै प्रचार हुन नसक्दा सोचेअनुरूप बिक्री हुन नसकेको बताएका हुन् ।

फूल बेच्न भृकुटीमण्डप आएका व्यापारी मंगेश लिम्बूले आफूहरू मार्कामा परेको बताए । फुटपाथमा राख्नुभन्दा यहाँ व्यवस्थापन गर्नु राम्रो भए पनि प्रचारमा ढिलाइ गर्नाले समस्या भएको उनको भनाइ छ ।

"निश्चित ठाउँ तोकिनु अत्यन्तै राम्रो । विज्ञापन १५ दिन अघि गरेको भए व्यापारी र किसानहरूलाई मार्का पर्ने थिएन । जानकारी भएको भए फूल किन्न आउनुहुन्थ्यो । यहाँ राख्नु धेरै राम्रो तर विज्ञापन गर्न ढिलाइ भयो । बाहिर फुटपाथमा राख्नु भन्दा यसरी व्यवस्थापन गरेकै राम्रो," उनले भने । 

त्यस्तै, काभ्रे कोशिपारीबाट फूल बेच्न भृकुटीमण्डप आएका व्यापारी सुजन श्रेष्ठले भृकुटीमण्डप कोल्टे ठाउँ भएकाले फूल बेच्न ग्राहक नआएको दुखेसो गरे । उनले गाडी भाडासमेत नउठेको बताए ।

"भृकुटीमण्डप कोल्टे ठाउँ भएकाले फूल बेच्न पाएनौँ । ग्राहक आएनन् । गाडी भाडासम्म उठेन । घर जानलाई गाडी भाडासम्म छैन । उल्टै ऋण गरेर जानुपर्ने भयो । यहाँ राखेर महानगरपालिकाले धेरै नराम्रो गर्‍यो जस्तो लाग्छ," उनले भने । 

त्यस्तै, ओखलढुंगाबाट फूल व्यापार गर्न आएका तेजेन्द्र विष्टले पनि नेपाली उत्पादनको फूललाई अपहेलना गरिएको बताए । उनले अझै पनि बजारीकरणको समस्या भएकाले व्यापारीले फूल खोलामा फालेर हिँड्नुपर्ने स्थिति आएको बताए ।

"किसानले फूल खोलामा फालेर हिँड्नुपरेको छ । नेपाली उत्पादनलाई अपहेलना गरिएको छ । नेपाली उत्पादन सम्भावनाभित्र नरहेको । सरकारको ध्यान जानु आवश्यकता छ । उत्पादन भएको बजारीकरणको समस्या भएकाले किसानको दुःखदायी अवस्थामा भएको छ," उनले भने ।

उनले पनि फूल बिक्री स्टलको बेलैमा प्रचारप्रसार नभएकोले बिक्री हुन नसकेको बताए ।