काठमाडौं । पछिल्ला दिन नेपाली सेना पाँच वटा रणनीतिक महत्वका सडक निर्माणको जिम्मेवारी पाएको छ । सरकारी निकायले उक्त सडक निर्माण गर्ने जिम्मेवारी सेनालाई दिएका हुन् । 

सेनाले निर्माण गरिरहेका सडकमा काठमाडौं/तराई–मधेस द्रुतमार्ग सडक आयोजना, कर्णाली करिडोर सडक आयोजना, बेनीघाट–आरुघाट–लार्केभञ्ज्याङ्ग सडक आयोजना, उत्तर दक्षिण कोशी सडक खाँदबारी किमाथांका सडक आयोजना र दार्चुला–टिंकर सडक आयोजना छन् । 

२०७४ असारबाट सुरु भएको काठमाडौं/तराई–मधेस द्रुतमार्ग सडक आयोजनाको काम सेनाले गरिरहेको छ । ७२.५ किलोमिटर लामो द्रुतमार्ग निर्माण सुरु गरेको ६ वर्ष ४ महिना बितिसकेको छ । सेनाले द्रुतमार्ग निर्माण कार्य २०८३ चैत मसान्तसम्म सम्पन्न गर्नुपर्नेछ । 

नेपाली सेनाका प्रवक्ता तथा सहायक रथी कृष्णप्रसाद भण्डारीका अनुसार, २०८० असोज मसान्तसम्म द्रुतमार्गको भौतिक प्रगति २७ प्रतिशत र वित्तीय प्रगति २९ प्रतिशत रहेको छ । द्रुतमार्गको आयोजनाको काम ११ वटा कलस्टरअन्तर्गत १३ वटा प्याकेजमा भइरहेको छ । प्याकेज नं. १, २, ३, ४, ५, ६ र ७ को खरिद सम्झौता भई निर्माण कार्य भइरहेको छ ।

प्याकेज नं. ८ र ९ ‘क’ को २०८० वैशाख ८ गते तथा प्याकेज नं. ९ ‘ख’ को लागि आव्हान गरिएको अन्तराष्ट्रिय बोलपत्र भदौ १३ गते खोलुवा भई मूल्याङ्कन प्रक्रियामा रहेको सेनाले जनाएको छ । प्याकेज नं. १० को २०८० भदौ १ गते बोलपत्र आह्वान र असोज १८ गते खोलुवा भई मूल्याङ्कन प्रक्रियामा छ ।

द्रुतमार्गअन्तर्गत निर्माणाधीन सुरुङ्गहरुको लम्बाई ६.४१५ किलोमिटर रहेकोमा हालसम्म ३ हजार ५० मिटर (४७.५५ प्रतिशत) सुरुङ खन्ने कार्य सम्पन्न भएको छ । द्रुतमार्ग आयोजनाअन्तर्गतका ८९ वटा पुलहरुमध्ये ६२ वटा पुलको निर्माण कार्य भइरहेको छ । 

कर्णाली करिडोर (लालीबगर–दुल्लीकुन्न, घाटपारीचौर–बद्रीगाउँ–भुक्काखोला खण्ड) सडक आयोजनामा आर्थिक वर्ष २०७९/८० मा सेनाले ६ किलोमिटर नयाँ ट्रयाक खोल्ने काम सेनाले गरेको थियो । 

कर्णाली करिडोरको उक्त २२.०५ किलोमिटर खण्डमा सेनाले हालसम्म ९.५ किलोमिटर ट्रयाक खोल्ने काम गरिसकेको छ । चालु आर्थिक वर्ष २०८०/८१ को पहिलो तीन महिना (साउनदेखि असोजसम्म) सेनाले ०.४ किलोमिटर नयाँ ट्रयाक निर्माण सम्पन्न गरेको छ । 

सेनाले यसवर्ष ९२ किलोमिटर लामो बेनीघाट–आरुघाट–लार्केभञ्ज्याङ्ग सडक आयोजनामा पनि काम गरिरहेको छ । 

नेपाली सेनाका अनुसार, गत आर्थिक वर्ष २०७९/८० मा बेनीघाट–आरुघाट–लार्केभञ्ज्याङ्ग सडक आयोजनामा ३ किलोमिटर नयाँ ट्रयाक निर्माण र ४ किलोमिटर ट्रयाक स्तरोन्नति गरी कुल ३५.५ किलोमिटर नयाँ ट्रयाक निर्माण र ८ किलोमिटर ट्रयाक स्तरोन्नति गर्ने काम भएको थियो । 

उक्त सडक आयोजनामा चालु आर्थिक वर्ष २०८०/८१ को पहिलो तीन महिनामा ०.२५ किलोमिटर नयाँ ट्रयाक निर्माण र ०.३ किलोमिटर ट्रयाक स्तरोन्नति गर्ने काम सम्पन्न भएको सेनाले जनाएको छ । 

सेनाले १०.५ किलोमिटर लामो उत्तर दक्षिण कोशी सडक खाँदबारी किमाथांका सडक आयोजना (च्याम्ताङ्ग–घोङघप्पा खण्ड) को काम पनि तीव्र गतिमा अघि बढाएको छ ।

आर्थिक वर्ष २०७९/८० मा उक्त सडक खण्डमा ३.५ किलोमिटर नयाँ ट्रयाक निर्माण र २.५ किलोमिटर ट्रयाक स्तरोन्नति गर्ने काम सेनाले गरेको थियो । यससँगै च्याम्ताङ्ग–घोङघप्पा खण्डमा कुल ६.५ किलोमिटर नयाँ ट्रयाक निर्माण र ३ किलोमिटर ट्रयाक स्तरोन्नति गर्ने काम सकिएको थियो ।

चालु आर्थिक वर्ष २०८०/८१ को पहिलो तीन महिनामा सेनाले उत्तर–दक्षिण कोशी सडक खाँदबारी किमाथांका सडक आयोजनामा ०.२ किलोमिटर नयाँ ट्रयाक निर्माण र ०.३५ किलोमिटर ट्रयाक स्तरोन्नति कार्य गरेको छ । 

सेनाले चालु आर्थिक वर्ष २०८०/८१ को पहिलो तीन महिनामा ७९ किलोमिटर लामो दार्चुला–टिंकर सडक आयोजनाको ०.१९ किलोमिटर नयाँ ट्रयाक निर्माण र ०.११ किलोमिटर ट्रयाक स्तरोन्नति गरेको छ । 

गत आर्थिक वर्ष २०७९/८० सम्म सेनाले दार्चुला–टिंकर सडक आयोजनाको कुल १०.४ किलोमिटर नयाँ ट्रयाक निर्माय र १.५ किलोमिटर ट्रयाक स्तरोन्नती गर्ने कार्य सकेको थियो ।