काठमाडौं । लिग चरणको आफ्नो अन्तिम खेलमा श्रीलंकालाई पाँच विकेटले हराउँदै साविक उपविजेता न्युजिल्यान्डले आईसीसी एकदिवसीय विश्वकपको सेमिफाइनल पुग्ने सम्भावना बलियो बनाएको छ ।

बिहीबार बेंगलुरुस्थित एम चिन्नास्वामी रंगशालामा सम्पन्न खेलमा श्रीलंकाले प्रस्तुत गरेको १७२ रनको लक्ष्य न्युजिल्यान्डले २३.२ ओभरमा पाँच विकेट गुमाएर पूरा गर्‍यो । 

न्युजिल्यान्डको जितमा ओपनरद्वय डेवोन कोन्वेले ४५ र रचिन रविन्द्रले ४२ रन जोडे । डार्यल मिचेलले ४३, ग्लेन फिलिप्सले १७ र कप्तान केन विलियम्सनले १४ रन थपे ।

एन्जेलो म्याथ्युजले दुई विकेट लिए । दुस्मन्था चमिरा र महिष थिक्षणाले समान एक विकेट लिए ।

त्यसअघि टस हारेर ब्याटिङमा आएको श्रीलंकाले ४६.४ ओभरमा सबै विकेट गुमाएर १७१ रनको योगफल खडा गरेको थियो ।

श्रीलंकाका कुशल परेराले २८ बलमा नौ चौका र दुई छक्कासहित ५१ रन बनाए । २२ बलमै ५० बनाएका उनी जारी विश्वकपमा सबैभन्दा छिटो अर्धशतक बनाउने खेलाडीसमेत बने । महिस थिक्षणाले ३८ रन थपे । धनन्जय डी सिल्भाले १९, एन्जेलो म्याथ्युजले १६ र दिल्सान मदुसंकाले १९ रन जोडे ।

न्युजिल्यान्डका ट्रेन्ट बोल्टले तीन विकेट लिए । लकी फर्गुसन, रचिन रविन्द्र र मिचेल स्यान्टनरले समान दुई विकेट लिए । टिम साउदीले एक विकेट हात पारे ।

सेमिफाइनल प्रवेश गर्ने सम्भावनालाई कायम राख्न न्युजिल्यान्डलाई आज जित्नैपर्ने दबाबमा थियो । नौ खेलबाट १० अंक जोडेको न्युजिल्यान्ड तालिकाको चौथो स्थानमा छ । यता, श्रीलंकाको भने सेमिफाइनल पुग्ने सम्भावना समाप्त भइसकेको छ । नौ खेलबाट चार अंक जोडेको श्रीलंका तालिकाको नवौँ स्थानमा छ ।