काठमाडौं । नेकपा (एकीकृत समाजवादी)का अध्यक्ष माधवकुमार नेपालले कोसी प्रदेशमा सर्वदलीय सरकार बनाउनुपर्ने बताएका छन् ।

शनिबार विराटनगर विमानस्थलमा सञ्चारकर्मीसँग उनले कोसीमा स्थिरता कायम गर्न सर्वदलीय/सर्वपक्षीय सरकार बनाउनुपर्नेमा जोड दिए ।

केन्द्रमा एकप्रकारको गठबन्धन भए पनि कोसी प्रदेशमा सांसद संख्याका कारण अस्थिरता भएकाले सबै मिलेर स्थिर सरकार बनाउनुपर्ने उनले उल्लेख गरे । उनले कोसी प्रदेशमा कुनै एक पक्षलाई निषेध गर्ने वातावरण नरहेको स्पष्ट पारे ।

कोसी नामकरणबारेको विवाद आवश्यक नरहेको भन्दै उनले जनताको भावनालाई सम्मान गर्न प्रदेशसभा बैठकबाट सो विषय टुंग्याउनुपर्ने धारणा व्यक्त गरे ।

अध्यक्ष नेपालले आममाफी दिने विषयमा सर्वोच्च अदालतको परमादेश उपयुक्त भएको भन्दै विगतका गल्ती–कमजोरीलाई सच्याएर अघि बढ्न सरकारलाई आग्रह समेत गरे ।