काठमाडौं । निजी क्षेत्रको मोबाइल सेवा प्रदायक एनसेलले कर्णाली प्रदेश सरकारलाई ५० लाख रुपैयाँ सहयोग गर्ने भएको छ । भूकम्पपीडितको उद्धार, उपचार र राहतमा तत्काल सघाउन सो रकम उपलब्ध गराउने निर्णय गरिएको एनसेलले जनाएको छ ।

यस्तै, भूकम्प प्रभावित जिल्ला जाजरकोट, रुकुम पश्चिम र रुकुम पूर्वमा ४० लाख रुपैयाँबराबरका एनसेलका सेवा निःशुल्क उपलब्ध गराइने कम्पनीले जनाएको छ ।

यसरी पाइने सेवामा देशका अरू नेटवर्क र विदेशमा समेत कल गर्न सकिने एनसेलले जानकारी गराएको छ ।

शनिबार विज्ञप्ति जारी गर्दै एनसेलले भूकम्पमा परी ज्यान गुमाउनेहरूप्रति श्रद्धाञ्जली अर्पण र शोकाकुल परिवारमा समवेदना व्यक्त गरिएको छ । घाइतेहरूको शीघ्र स्वास्थ्यलाभको कामना गरिएको छ ।

“...यस दुःखद घडीमा एनसेल भूकम्प प्रभावित जिल्लाका जनताहरूसँगै रहेको जानकारी गराउन चाहन्छौँ । एनसेलले भूकम्पपीडितको उद्धार, उपचार र राहतमा तत्काल सहयोग गर्न कर्णाली प्रदेश सरकारलाई रु ५० लाख रुपैयाँ उपलब्ध गराउने निर्णय गरेको छ,” विज्ञप्तिमा उल्लेख छ, “साथै, ग्राहकहरूलाई आफ्ना प्रियजनहरूसँग सम्पर्कमा रहन र सोही क्षेत्रमा राहत तथा उद्धारकार्यलाई सहयोग पुर्‍याउन प्रभावित जिल्ला जाजरकोट, रुकुम (पश्चिम) र रुकुम (पूर्व)मा रहेका ग्राहकहरूलाई रु ४० लाखबराबरको सेवाहरू निःशुल्क उपलब्ध गराइने जानकारी गराउन चाहन्छौँ । यसरी पाइने सेवामा देशका अन्य नेटवर्क र विदेशमा समेत कल गर्न सकिने सेवा रहनेछन् ।”