काठमाडौं । एक छोराले आफ्नी ५१ वर्षीया आमालाई प्रयोग गरेर अनलाइनबाट ठूलो ठगी गरेपछि पक्राउ परेका छन् । आफ्नो चिनजान रहेका एक धनाढ्य पुरुषसँग आफ्नो बच्चा बेलाकी २७ वर्षीया साथी भनेर आफ्नै आमालाई ती छोराले चिनाएका थिए ।

त्यसपछि अनलाइन रोमान्सकै तरिकाबाट एकलाख १० हजार अमेरिकी डलर (एक करोड ४६ लाख नेपाली रुपैयाँ)  ठगी गरेको पाइएको हो ।

ली थर(उपनाम) रहेका ती व्यक्तिले आफ्नो आमाको ऋण तिर्न झू थरका एक धनाढ्य साथीलाई ठग्ने योजना बनाएका हुन् ।

लीले झूलाई साङ्घाई कम्पनीमा इन्टर्न गर्ने बेला भेटेका थिए । तर, दक्षिणी चीनको गुआङ्सी झुआङ स्वायत्त क्षेत्रमा आफ्नो घर फर्किएपछि पनि उनी ती धनाढ्य साथीको सम्पर्कमै रहे ।

गत वर्ष लीले लुये थर भनेर परिचय गराउँदै आफ्नी आमालाई विच्याटमार्फत झुसँग सम्पर्क गराएका थिए । त्यसपछि उनीहरूले अनलाइन डेटिङ गर्न थाले ।

लीकी आमाले झूलाई भेट्ने र भविष्यमा विवाह गर्न सांघाई पुग्ने भनेकी थिइन् ।

सन् २०२२ को अप्रिलमा लीकी आमाले झूबाट आठ लाख युआन (चिनियाँ मुद्रा) भन्दा बढी रकम ठगी गरिसकेकी थिइन् ।

उनले विभिन्न बाहना गर्दै पैसा फिर्ता नगर्ने गरेको र उल्टै हजारौँ रकम माग्ने गरेको बताइएको छ ।

उनले ‘तिमीबाहेक अरू कसैसँग कहिल्यै हुने छैन’ भन्दै एकैपटक ७५ हजार अमेरिकी डलर समेत मागेको खुलेको छ । झूलाई शंका लागेपछि महिलाले उनलाई विच्याटमा ब्लक गरेकी थिइन् । त्यसपछि गत सेप्टेम्बरमा ती पुरुषले प्रहरीमा निवेदन दिएका थिए ।

गत महिना अनुसन्धानपछि प्रहरीले ली र उनकी आमालाई गुआङ्सी झुआङ स्वायत्त क्षेत्रस्थित उनीहरूको घरबाट पक्राउ गरेको बताइएको छ ।

साउथ चाइना मर्निङ पोस्टबाट ।