काठमाडौं । आईसीसी एकदिवसीय विश्वकपमा एसोसिएट राष्ट्र नेदरल्यान्ड्सले टेस्ट मान्यताप्राप्त बंगलादेशविरुद्ध ८७ रनको सहज जित निकालेको छ । यो हारसँगै जारी विश्वकपमा बंगलादेश सेमिफाइनल होडबाट बाहिरिने पहिलो टिम बनेको छ ।

शनिबार भारतको कोलकातास्थित इडेन गार्डेन रंगशालामा भएको खेलमा नेदरल्यान्ड्सले प्रस्तुत गरेको २३० रनको लक्ष्य पछ्याउने क्रममा बंगलादेश ४२.२ ओभरमा १४२ रनमै समेटियो ।

बंगलादेशका मेहिदी हसन मिराजले ३५ रन बनाए । मुस्ताफिजुर रहमान र महमुदुल्लाहले समान २० रन थपे । मेहेदी हसनले १७, तान्जिद हसनले १५ र ताक्सिन अहमेदले ११ रन जोडे ।

बंगलादेशलाई सस्तैमा समेट्न नेदरल्यान्ड्सका पाउल भान मिकेरेनले चार विकेट लिए । बास डे लिडेले दुई र आर्यन दत्त, लोगन भान बिक र कोलिन अकेरमनले समान एक विकेट झारे ।

त्यसअघि, टस जितेर ब्याटिङमा उत्रिएको नेदरल्यान्ड्सले निर्धारित ५० ओभरमा सबै विकेट गुमाएर २२९ रन बनाएको थियो ।

नेदरल्यान्ड्सका कप्तान स्कट एड्वार्डसले ६८ रन बनाए । वेस्ली बरेसीले ४१, साइब्रान्ड एन्जेलब्रेटले ३५, लोगन भान बिकले २३, बास डे लिडेले १७ र कोलिन अकेरमनले १५ रन थपे ।

बंगलादेशका सोरिफुल इस्लाम, तक्सिन अहमेद, मुस्ताफिजुर रहमान र मेहेदी हसनले समान दुई विकेट लिए । साकिब अल हसनले एक विकेट लिए ।

प्रतियोगितामा दोस्रो जित निकालेको नेदरल्यान्ड्स तालिकाको आठौँ स्थानमा उक्लिएको छ । नेदरल्यान्ड्सले ६ खेलबाट चार अंक जोडेको छ । समान खेलबाट दुई अंकको बंगलादेश नवौँ स्थानमा छ ।