काठमाडौं । म्यानचेस्टर सिटीका मुख्य प्रशिक्षक पेप ग्वार्डिओलाले टिमका फरवार्ड एर्लिङ हाल्यान्डले ‘जीवनभर गोल गरिरहने’ बताएका छन् ।

सिटीले च्याम्पियन्स लिग समूह ‘जी’ को खेलमा बुधबार योङ ब्वाइजविरुद्ध ३–१ को जित निकालेको थियो । सिटीको यो जितमा टिमका प्रमुख फरवार्ड हाल्यान्डले दुई गोल गरेका थिए ।

खेलपछि टिमका प्रमुख फरवार्डको प्रशंसामा समय खर्चिएका प्रशिक्षक ग्वार्डिओलाले ‘समर्थकहरूको चाहना हाल्यान्ड असफल हुन् भन्ने रहेको’ प्रतिक्रिया समेत दिए ।

“यसरी मौका पाउनु निक्कै महत्वपूर्ण हुन्छ । समर्थकहरु हाल्यान्डले हरेक खेलमा चार गोल गरुन् भन्ने चाहन्छन् । उनीहरु हाल्यान्ड असफल हुन् भन्ने चाहन्छन्,” ग्वार्डिओलाले भने, “हाल्यान्ड आफ्नो जीवनभर पाएको मौका सदुपयोग गर्दै गोल गरिरहने छन् । उनी विपक्षी टिमका लागि असाधारण चुनौती हुन् ।”

बुधबारको जितमा हाल्यान्डले दुई गोल गर्दा अर्को एक गोल म्यानुअल अकान्जीले गरेका थिए । समूह ‘जी’ मा लगातार तेस्रो जित निकालेको सिटी नौ अंकसहित तालिकाको शीर्ष स्थानमा छ । सिटीसँग हार बेहोरेको योङ ब्वाइज तीन खेलबाट एक अंकसहित तालिकाको तेस्रो स्थानमा छ ।