काठमाडौं । भारतमा जारी आईसीसी एकदिवसीय विश्वकपमा अस्ट्रेलियाले नेदरल्यान्ड्समाथि ३०९ रनको कीर्तिमानी जित निकालेको छ ।

यो एकदिवसीय विश्वकपमा सबैभन्दा ठूलो रनअन्तरको जित हो । यसअघि सन् २०१५ को विश्व कपमा अस्ट्रेलियाले नै अफगानिस्तानलाई २७५ रनले हराउदै यो कीर्तिमान बनाएको थियो ।

बुधबार दिल्लीस्थित अरुण जेट्ली क्रिकेट रंगशालामा अस्ट्रेलियाले प्रस्तुतगरेको ४०० रनको लक्ष्य पछ्याएको नेदरल्यान्ड्स २१ ओभरमा ९० रनमै समेटियो ।

नेदरल्यान्ड्सका विक्रमजित सिंहले २५ रन जोडे । तेजा निदामानुरुले १४, कप्तान स्टक एड्वार्डसले अविजित १२ कोलिन एकरम्यानले १२ र साइब्रान्ड एन्गलब्रेचले ११ रन जोडे ।

अस्ट्रेलियाका लागि एडम जाम्पाले चार विकेट लिए । मिचेल मार्शले दुई र जोश हेजलउड समान दुई विकेट लिए । यस्तै, मिचेल स्टार्च र प्याट कमिन्सले एक-एक विकेट हात पारे ।  

त्यसअघि टस जितेर ब्याटिङ रोजेको अस्ट्रेलियाले निर्धारित ५० ओभरमा आठ विकेट गुमाएर ३९९ रनको योगफल तयार पारेको थियो ।

अस्ट्रेलियाबाट कीर्तिमानी ब्याटिङ गरेका ग्लेन म्याम्सवेलले ४४ बलमा नौ चौका र आठ छक्कासहित १०६ रनको

योसँगै म्याक्सवेलले सबैभन्दा कम बलमा विश्वकपमा शतक बनाउने कीर्तिमान कायम गरेका छन् । उनले यसै विश्वकपमा दक्षिण अफ्रिकाका आइदेन मार्करमले ४९ बलमा बनाएको शतकको कीर्तिमान तोडेका हुन् ।

डेविड वार्नरले १०४ रन थपे । उनले ९३ बलमा ११ चौका र तीन छक्का प्रहार गरे । स्टिभ स्मिथले ६८ बलमा नौ चौका र एक छक्काको मद्दतले ७१, मार्नुस लाबुसचेन्जले ६२, जोश इङ्लिसले १४ र कप्तान प्याट कमिन्सले अविजित १२ रन जोडे ।  

नेदरल्यान्ड्सका लागि लोगन भान बिकले चार विकेट लिए । यस्तै, बास डी लिडेले दुई र आर्यन दत्तले एक विकेट लिए ।

जितसँगै अस्ट्रेलिया पाँच खेलबाट ६ अंकसहित चौथो स्थानमा उक्लिएको छ । प्रतियोगितामा चौथो हार बेहोरेको नेदरल्यान्ड्स समान खेलबाट दुई अंकसहित पुछारमा छ ।