काठमाडौं । आईसीसी एकदिवसीय विश्वकपमा अफगानिस्तानले घरेलु टिम भारतविरुद्ध २७३ रनको लक्ष्य प्रस्तुत गरेको छ ।
भारतको नयाँदिल्लीस्थित अरुण जेट्ली रंगशालामा टस जितेर ब्याटिङमा आएको अफगानिस्तानले निर्धारित ५० ओभरमा आठ विकेट गुमाएर २७२ रनको योगफल खडा गर्यो।
अफगानिस्तानका कप्तान हस्मतुल्लाह साहोदीले ८० रन बनाए । उनले ८८ बलमा आठ चौका र एक छक्का प्रहार गरे । अज्मतुल्लाह ओमरजाइले ६२ रन थपे । ६३–३ को कठिन अवस्थामा रहँदा यी दुईले चौथो विकेटका लागि १२१ रनको साझेदारी गर्दै अफगानिस्तानको स्कोरबोर्ड सम्हालेका थिए ।
इब्राहिम जद्रानले २२, रहमनुल्लाह गुर्बजले २१, मोहम्मद नाबीले १९ र रहमत साहले १६ रन जोडे ।
भारतका जसप्रित बुमराहले चार विकेट लिए । हार्दिक पन्ड्याले दुई विकेट लिदा शार्दुल ठाकुर र कुलदीप यादवले समान एक विकेट लिए ।
प्रतियोगितामा दुवै टिमको यो दोस्रो खेल हो । यसअघि, पहिलो खेलमा भारतले अस्ट्रेलियाविरुद्ध ६ विकेटले हराएको थियो । अफगानिस्तान भने यसअघि पहिलो खेलमा बंगलादेशसँग ६ विकेटले नै पराजित भएको थियो ।
एकदिवसीय विश्वकपको इतिहासमा भारतले दुईपटक उपाधि जितेको छ । भारतले सन् १९८३ र २०११ मा उपाधि जितेको थियो । अफगानिस्तानले भने हालसम्म विश्वकपको उपाधि जितेको छैन ।
