काठमाडौं । अभिनेता विपीन कार्कीले ‘भष्मे डन’ आफ्नो पहिचान भएको बताएका छन् । आफूलाई चिन्ने नाम नै  ‘भष्मे डन’ भएको उनको अनुभव छ । 

“भष्मे डन मेरा लागि एउटा चलचित्रको क्यारेक्टर मात्रै होइन । यसलाई मैले मेरो एउटा सिनेमाको क्यारेक्टरका रूपमा मात्रै हेरेको छैन,” चलचित्र पशुपतिप्रसाद–२ : भष्मे डनको ट्रेलर रिलिज कार्यक्रममा विपीनले भने, “भष्मे डन मेरो पहिचान हो । भष्मे डन मेरो परिचय हो । मलाई यसमा गौरभ पनि छ ।” 

आफूलाई विपीनभन्दा पनि ‘भष्मे डन’ भनेर चिन्नको संख्या धेरै रहेको उनले बताएका छन् । “मलाई धेरैले यहीबाट चिन्नु हुन्छ । विपीन कार्की भनेर चिनाउँदा चिनेन भने भष्मे डन भनेर भनेपछि चिन्नुहुन्छ । यतिभन्दा पनि चिनेन भने भष्मेको स्वर निकालेपछि ए यो पो रै’छ भन्नुहुन्छ,” उनले भने । 

चलचित्र ‘पशुपतिप्रसाद’प्रति आफ्नो बेग्लै एट्याचमेन्ट रहेको उनले बताएका छन् । “मैले मेरो जीवनभर नभुल्ने क्यारेक्टर हो यो । मेरो मनको ग्यालरीभित्र बस्ने क्यारेक्टर हाे भष्मे डन । मेरो बेस्ट क्यारेक्टरमध्येको एक हो यो ।” 
 
‘चलचित्र पशुपतिप्रसाद–२ : भष्मे डन’ कात्तिक ४ गते रिलिज हुँदै छ । दीपेन्द्र के खनालले निर्देशन गरेको चलचित्रको लेखक तथा निर्देशक खगेन्द्र लामिछाने हुन् । 

चलचित्रमा विपीन कार्की, सौगात मल्ल, स्वस्तिमा खड्का, प्रकाश घिमिरेलगायत कलाकार मुख्य भूमिकामा छन् ।