काठमाडौं । राष्ट्रिय जनमोर्चाका अध्यक्ष चित्रबहादुर केसीले जनतालाई संघीय व्यवस्था मान्य नभएको बताएका छन् । आइतबार प्रतिनिधिसभा बैठकको विशेष समयमा बोल्दै सांसद केसीले नेपाली जनताले नेपालमा एकात्मक प्रणालीको विकल्प संघात्मक प्रणाली हुन नसक्ने कुरा महसुस गरिसकेको बताए ।

नेपाली जनताले संघीयता मान्य छैन भनेर देखाइसकेको उनले बताए । जनतालाई मान्य नहुँदा पनि संघीयताको मुरली किन बजाइरहेको भनेर सांसदहरुलाई उनले प्रश्न गरे । मुख्यमन्त्रीहरुलाई भैँसेपाटीमा दरबार बनाउनु नै संघीयता हो ? भन्ने उनको प्रश्न थियो ।

“लाज नमानिकन प्रजातान्त्रिक विकेन्द्रीकरण गरौँ । नगरपालिका र गाउँपालिकालाई अधिकार दिऔँ । नेपालमा एकात्मक प्रणालीको विकल्प संघात्मक प्रणाली हुँदै होइन,” उनले भने, “नेपाली जनताले महसुस गरिसके । हामीले यहाँ जति घोक्रो फुलाए पनि नेपाली जनतालाई यो मान्य छैन भनेर देखाइसके । कोसीमै देखाइरहेका छौँ ।”

अध्यक्ष केसीले संघीयताले गरी नखाएको टिप्पणी गरे । प्रजातान्त्रिक विकेन्द्रीकरण गरेर स्थानीय तहलाई अधिकार दिनुपर्ने उनको भनाइ थियो ।