भ्यानकुभर । सहरको  मुटुमै रहेको ‘भोग थिएटर’ मा नेपथ्य कन्सर्ट सकिएपछि दर्शक उत्साहका साथ बाहिरिँदै थिए । त्यतिबेलै क्यानडा बस्दैआएका बिरु महर्जनले भिडियो रेकर्डिङ सुरु गरे । त्यो लाइभ रेकर्डमा बोल्ने सबै दर्शक खुसी प्रकट गरिरहेका थिए । कतिपयले ‘भ्यानकुभरमा आजसम्मकै सबैभन्दा भब्य नेपाली कार्यक्रम’ भनेर प्रतिक्रिया ब्यक्त गरिरहेका थिए । 

क्यानडामा सांगीतिक यात्रामा रहेको लोकरक ब्याण्ड नेपथ्यको दोस्रो कन्सर्ट भ्यानकुभरमा सम्पन्न भएको छ । कन्सर्टको सुरुआत अघिल्लो पटकजस्तै ‘सा कर्णाली’ म्यूजिक भिडियोबाट भएको थियो । त्यसलाई वैदेशिक रोजगारीमा गएकाहरूको भावमा उभ्याइएको ‘मैमरि जाउँला’ गीतले निरन्तरता दिएको थियो ।

चर्को स्वागतका बीच मञ्चमा नेपथ्य टोली आएपछि भने ‘कोसीको पानी यो जिन्दगानी’ ब्याण्डको पहिलो प्रस्तुति बन्नपुग्यो । गीतमा रहेको ‘आमाको कोखमा बासमात्र लिएँ, कुन देशको मरन हौ हजुर’ गाइरहँदा दर्शकदीर्घामा कतिपय अनुहार भावुक देखिन्थे । 

कन्सर्टमा ‘भेँडाको ऊन’, ‘छेक्यो छेक्यो’, ‘आँगनैभरि’, ‘लामपाते सुरती’, ‘यो जिन्दगानी’, ‘रेशम’, ‘तालको पानी’, ‘रातो र चन्द्रसूर्जे’ लगायत गीत गाइएको थियो । 

कन्सर्टमा अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुबिन शाक्य, गितारमा निरज गुरुङ र मादलमा शान्ति रायमाझीले सघाएका थिए ।

भ्यानकुभरको दोस्रो कन्सर्ट सम्पन्न भएपछि अब ब्याण्ड ८ तारिख आइतबारका दिन टोरन्टोमा प्रस्तुत हुने भएको छ । शोका लागि टोली टोरन्टो पुगिसकेको छ ।