काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले शान्ति प्रक्रियालाई राजनीतिक स्वार्थको खेल बनाउन नहुनेमा जोड दिएका छन् ।

सोमबार काठमाडौंमा पार्टीको वाग्मती प्रदेश अधिवेशनको उद्घाटन समारोहमा उनले पीडितलाई पीडा दिन नहुनेमा जोड दिए । शान्ति प्रक्रियाका नाममा ‘आफ्ना’ मान्छेलाई पैसा बाँड्ने कार्य नगर्न उनले सचेत गराए ।

“शान्ति प्रक्रिया राजनीतिक स्वार्थको खेल नबनाउनुस्, प्रधानमन्त्रीज्यू,” उनले भने, “पीडितलाई पीडा दिएर, आफ्ना मान्छेलाई पैसा बाँडेर ।”

शान्ति प्रक्रिया टुंग्याउन पीडितको घाउमा मल्हम लगाउनुपर्ने आवश्यकता उनले औँल्याए । “शान्ति प्रक्रिया टुंग्याउन पीडितको घाउमा मल्हम नलगाएर अन्तर्राष्ट्रिय समुदायसँग सहयोग मागेर के हुन्छ ?,” उनले प्रश्न गरे ।

उनले आफ्नो पार्टीलाई फेरि फुटाउने प्रयास गरिएको जिकिर गरे । त्यस्तो प्रयास असफल पारिने उनले बताए । “एमालेलाई फेरि फुटाउँछौँ भन्ने प्रयास चकनाचुर पार्नेछ,” उनले भने ।

राष्ट्रिय परिचयपत्र बनाउँदा टोपी खोल्नुपर्ने, सिन्दूर पुछ्नुपर्ने भन्दै ओलीले त्यसप्रति समेत आपत्ति जनाए ।