बीबीसी । अमेरिकी राष्ट्रिय सुरक्षा सल्लाहकार ज्याक सुलिवनले खालिस्तान समर्थक हरदीप सिंह निज्जरको हत्याका सम्बन्धमा भारतलाई कुनै ‘विशेष छुट’ नदिने बताएका छन् । निज्जरको हत्यालाई लिएर क्यानडा र भारतबीच तनाव बढिरहेका बेला अमेरिकी राष्ट्रिय सुरक्षा सल्लाकार सुलिवनले उक्त कुरा बताएका हुन् ।
 
क्यानडाका प्रधानमन्त्री जस्टिन ट्रुडोले निज्जरको हत्यामा भारतको हात रहेको बताएपछि अहिले क्यानडा र भारतबीच तनाव बढिरहेको छ । तनाव बढिरहेका बेला सुलिवनले निज्जरको हत्यालाई लिएर उच्च तहमा भारतीय अधिकारीहरूसँग अमेरिकाले सम्पर्क गरिरहेको बताएका छन् । 

“यसप्रकारको कामको लागि तपाईंले कुनै विशेष छुट पाउनु हुन्न । देशको मतलव नगरी हामी खडा हुन्छौं र आधारभूत सिद्धान्तहरूको रक्षा गर्छौं । हामी क्यानडाजस्तो सहयोगीसँग नजिक रहेर काम गर्छौं, किनकी यस घटनामा जाँच तथा कूटनीतिक प्रक्रिया क्यानडाले अघि बढाएको छ,” ह्वाइट हाउसमा सञ्चाकर्मीसँग सुलिवनले भने ।
  
पछिल्ला दिन अमेरिका भारतसँग सम्बन्ध राम्रो बनाउन खोजिरहेको छ । यसवर्षको सुरुमै भारतीय प्रधानमन्त्री नरेन्द्र मोदी अमेरिका भ्रमणमा गएका थिए । अहिले अमेरिकालाई निज्जरको हत्याले भारतसँगको सम्बन्ध बिग्रिने चिन्ता छ । 
यस विषमा सुलिवनले जुनसुकै देश प्रभावित भए पनि अमेरिका आफ्नो सिद्धान्तको लागि खडा हुने स्पष्ट पारेका छन् । यस घटनामा अमेरिकाले भारत र क्यानडा दुवै देशसँग कुरा गरिरहेका समेत बताएका छन् । 

अमेरिकी सञ्चारमाध्यममा अमेरिकाले क्यानडासँग दूरी बढाइरहेको भन्ने आशयका समाचार आएपछि उनले क्यानडासँग कुनै मतभेद नरहेको स्पष्ट पारेका छन् । “म अमेरिका र क्यानडाबीच मतभेद छ भन्ने कुरालाई अस्वीकार गर्छु । जुन आरोप क्यानडाले लगाएको छ त्यसमा हामी चिन्तित छौं । हामी चाहन्छौं यो जाँच अघि बढ्नुपर्छ र अपराधिलाई दोषी ठहर गर्नुपर्छ,” उनले भने ।