काठमाडौं । भारतीय प्रधानमन्त्री नरेन्द्र मोदीले मोरिसस को सर्वोच्च सम्मान पाउने भएका छन् । मोरिसस का प्रधानमन्त्री नवीनचन्द्र रामगुलामले प्रधानमन्त्री मोदीलाई आफ्नो देशको सर्वोच्च सम्मान 'द ग्रान्ड कमान्डर अफ द अर्डर अफ द स्टार एन्ड की अफ द इन्डियन ओसन' प्रदान गर्ने घोषणा गरेका हुन् ।

प्रधानमन्त्री मोदी यो सम्मान पाउने पहिलो भारतीय हुन् । यो कुनै पनि देशले प्रधानमन्त्री मोदीलाई दिएको २१औँ अन्तर्राष्ट्रिय पुरस्कार हो ।

घोषणा गर्ने क्रममा मोरिसस का प्रधानमन्त्री रामगुलामले यो सम्मान मोदीका लागि निकै उपयुक्त हुने बताएका थिए । मोदीले मोरिसस र भारतको सम्बन्ध थप बलियो बनाउन महत्त्वपूर्ण भूमिका खेलेको उनको भनाइ छ ।

उनले मोरिसस गणतन्त्र भएयता यो सम्मान नेल्सन मन्डेलासहित पाँचजना विदेशीले मात्र पाएको पनि बताए ।

१२ मार्च १९६८ मा भारतीय मूलका सर सिवुसागुर रामगुलमको नेतृत्वमा मोरिसस ले बेलायती शासनबाट स्वतन्त्रता प्राप्त गरेको थियो ।

प्रधानमन्त्री नरेन्द्र मोदी दुई दिने राजकीय भ्रमणमा मंगलबा मोरिसस गएका थिए । मंगलबार दिउँसो उनले मोरिसस का राष्ट्रपति धरम गोखुललाई भेटेका थिए ।

सन् २०१५ पछि भारतीय प्रधानमन्त्रीको यो दोस्रो मोरिसस भ्रमण हो ।