काठमाडौं । पूर्वप्रधानमन्त्री एवं नेकपा (एकीकृत समाजवादी)का अध्यक्ष माधवकुमार नेपालले सुवास नेम्वाङलाई नेपाली राजनीतिका सहमति र समझदारीको हिमायतीको रूपमा चित्रण गरेका छन् । 

नेम्वाङले संविधान निर्माणमा मात्रै नभएर सबै राजनीतिक दलहरूबीच सहमति र सहकार्यको माध्यमबाट मुलुकमा राजनीतिक परिवर्तनको हरेक मोडमा नेतृत्वदायी भूमिका निर्वाह गरेको नेपालको भनाइ छ । 

एमाले उपाध्यक्षसमेत रहेका संविधानसभा अध्यक्ष नेम्वाङलाई श्रद्धाञ्जली दिन च्यासल पुगेका नेपालले सञ्चारकर्मीमाझ नेम्वाङ नेपालको राजनीतिक परिवर्तनको आन्दोलनको 'महान हस्ती' भएको बताए । 

अध्यक्ष नेपालले उनको निधनबाट नेपालको कम्युनिस्ट आन्दोलन, लोकतान्त्रिक आन्दोलन र परिवर्तनले आन्दोलनले अपूरणीय क्षति बेहोर्नुपरेको बताए । उनले नेम्वाङलाई सबैलाई मिलाएर लैजान सक्ने क्षमताको धनी नेताको रूपमा स्मरण गरे ।

नेम्वाङबारे के भने नेपालले ?

सुवास नेम्वाङ नेपालको परिवर्तनको आन्दोलनको एउटा महान हस्ती हुनुहुन्थ्यो । उहाँले नेपालको राजनीतिक परिवर्तनको प्रत्येक मोडहरूमा बडो कुशलताका साथ नेतृत्वदायी भूमिका निर्वाह गर्नुभयो । मुलुकमा गणतन्त्रको स्थापना भइसकेपछि संविधान निर्माण गर्नुपर्ने अभिभारा हाम्रो काँधमा आइसकेपछि त्यसलाई उहाँले बडो कुशलताका साथ निर्वाह गर्नुभयो । उहाँमा सबैलाई मिलाएर लिएर जान सक्ने मिलनसारिताको छुट्टै व्यक्तित्व थियो ।

उहाँ शालीन व्यक्तिको धनी हुनुहुन्थ्यो । उहाँ समस्याहरू बल्झाउन होइन, समाधान गर्न सधैँभरि लागिरहनुहुन्थ्यो । एकातर्फ उहाँको लोकतान्त्रिक आन्दोलनमा महत्त्वपूर्ण भूमिका छ भने अर्कोतर्फ कम्युनिस्ट आन्दोलनमा पनि उहाँको भूमिका अत्यन्तै महत्त्वपूर्ण रहेको छ । सुरुदेखि नै उहाँ प्रगतिशील आन्दोलनमा, वामपन्थी आन्दोलनमा, कम्युनिस्ट आन्दोलनमा लाग्नुभएको थियो । र, त्यही ध्येय र उद्देश्यका लागि उहाँले आफ्नो सम्पूर्ण जीवन यसैमा समर्पित गर्नुभयो ।

उहाँ यस्तो व्यक्तित्व हुनुहुन्थ्यो, जसले सबै अप्ठेराहरू, जटिलताहरूलाई कुशलताका साथ पार लगाउने कुरामा अगुवाइ गर्नुभयो । उहाँको योगदानलाई इतिहासले सधैँभरि स्मरण गरिरहने छ । नयाँ पुस्ताले उहाँबाट प्रेरणा प्राप्त गर्दै अघि बढ्ने छ । उहाँ सादा जीवनको पनि पक्षपाती, स्वच्छ छविको पनि पक्षपाति, मुलुकमा सुशासन स्थापना होस भन्ने चाहनाको पनि पक्षपाती । त्यसो हुनाले संविधान निर्माण गर्ने मात्रै होइन, त्यसलाई कसरी कार्यान्वयन गर्न सकिन्छ ? कार्यान्वयन गर्ने कुरामा पनि उहाँको अत्यन्त धेरै हुटहुटी र जोड गर्ने गरेको पाइन्छ ।

अहिले देशमा जस्तो किसिमको राजनीतिक वातावरण बदलिनुपर्दछ । हाम्रा सहमति र समझदारीको वातारण निर्माण गर्नुपर्दछ भन्ने कुराको उहाँ हिमायती पनि हुनुहुन्थ्यो । त्यसो हुनाले उहाँको निधन सिंगो लोकतान्त्रिक आन्दोलनको निम्ति, कम्युनिस्ट आन्दोलनको निम्ति परिवर्तनको आन्दोलनको निम्ति ठूलो क्षति हो । म उहाँप्रति हार्दिक श्रद्धाञ्जली व्यक्त गर्न चाहन्छु । र, परिवारजनप्रति गहिरो समवेदना । उहाँका सपनाहरूलाई पूरा गर्नका लागि मैले आफ्नो तर्फबाट, हाम्रो पार्टीले आफ्नो तर्फबाट अधिकतम प्रयत्ने गर्ने छु ।

नेम्वाङको मंगलबार बिहान ७१ वर्षको उमेरमा निधन भएको थियो ।