काठमाडौं । ८५ ग्राम पहेँलो धातुसहित त्रिभुवन अन्तर्राष्ट्रिय विमानस्थलको आगमन पार्किङ एरियाबाट चारजना पक्राउ परेका छन् ।

भन्सार छली लैजान लागेको सुनजस्तो देखिने धातुको ब्रासलेट दुईथान र बेरुवा औँठी एकथानसहित शनिबार दिउँसो चारजनालाई नियन्त्रणमा लिइएको प्रहरीले जनाएको छ ।

पक्राउ पर्नेमा ताप्लेजुङको आठराई त्रिवेणी गाउँपालिका–१ का २१ वर्षीय अनिश गुरुङ र २१ वर्षीय रोशन विश्वकर्मा, काठमाडौं महानगरपालिका–८ का ३० वर्षीय शनि देउला र मोरङको पथरी शनिश्चरे नगरपालिका–१ का ३८ वर्षीय कमल गुरुङ रहेका छन् ।

अनिश र रोशन हिमालयन एयरको उडानमार्फत दोहाबाट काठमाडौं आएका थिए । उनीहरूलाई उक्त परिमाणको धातु भन्सार छली गर्न लगाएर शनि र कमलले संकलन गरी लैजान लागेको अवस्थामा प्रहरीले पक्राउ गरेको थियो । घटनाबारे थप अनुसन्धान गरिरहेको प्रहरीले जनाएको छ ।