काठमाडौं । प्रतिनिधिसभाको अन्तर्राष्ट्रिय सम्बन्ध र पर्यटन समितिमा सांसदहरुले चीनले जारी गरेको नयाँ नक्साबारे कुटनीतिक नोट पठाउन माग गरेका छन् । समितिको आजको बैठकमा राष्ट्रिय स्वतन्त्र पार्टीका सांसद शिशिर खनालले नक्सा छिमेकी र विश्व मञ्चमा प्रस्तुत गर्न के ले रोकेको छ ? भन्दै प्रश्न गरे ।

“नक्साको विषय संवेदनशील छ । हाम्रो नक्सा र भूगोलको अखण्डताको शपथ खाएका छौँ, सदनबाट पारित भएपछि अन्य छलफल भएनभन्दा अखण्डता कता गयो, हाम्रो नक्सा छिमेकी र मञ्चमा गएर प्रस्तुत गर्न केले रोकेको छ ? परराष्ट्र फेलिएर भएको हो ?,” उनले सोधे, “अब भएन । कहिलेसम्म हुन्छ भनेर माग्नुपर्छ । स्पष्ट टाइमलाइनसहित फलोअप गर्नुपर्छ ।”

उनले चीनको राजदूतको कुरा संवेदनशील रहेको बताउँदै तुरून्तै नोट पठाउन आग्रह समेत गरे ।

माओवादीका उपमहासचिव समेत रहेका सांसद वर्षमान पुनले प्रधानमन्त्रीको अब हुने भ्रमणमा सैन्य गठबन्धनमा संलग्न हुने गरी हस्ताक्षर गर्न नहुने बताए । विकास साझेदारीमा भने सहमति गर्नुपर्ने उनको भनाइ छ ।

“कोही पनि सैन्य गठबन्धनमा संलग्न हुने गरी साइन गर्ने हुनुहुँदैन । तर, विकास साझेदारीमा भने सहमति गर्न हिच्किचाउनु हुँदैन,” उनले भने ।

नेकपा (एमाले)का सांसद भीम आचार्यले चीनको नयाँ नक्सामा चुच्चे नक्सा किन परेन भन्दै प्रस्ट्याउन माग गरे ।  “चीनले प्रकाशित गरेको नक्सामा के कारणले नेपालको नक्सा परेन ? के कारण भन्छन्, थाहा भएन भन्छन् कि ? त्यो प्रस्ट पार्नुपर्छ । हाम्रो कमजोरी हो कि ?,” उनले भने ।

उनले भारत र चीनको सम्बन्धका कारण यस्तो भएको हो कि ? भन्ने प्रश्न पनि गरे । उनले प्रधानमन्त्रीको भ्रमण अघि नै शान्ति प्रकृयाको कानुन टुंगाएर जान पाए उपयुक्त हुने बताए । स्वतन्त्र सांसद प्रभु शाहले प्रधानमन्त्रीको चीन भ्रमण टोलीमा संसदीय सहभागिता जरूरी रहेको बताए । नाका ठप्प भएकाले चाडो खुल्ने वातावरण बनाउनुपर्ने उनको भनाइ छ ।

नेमकिपाका सांसद प्रेम सुवालले नक्साको विषयमा पत्र नगएको भए सरकारले आजको आजै पठाउनुपर्ने बताए । उनले यूएन भ्रमणबाट नेपाल फर्किएर मात्रै चीन भ्रमण जान प्रधानमन्त्रीलाई सुझाए ।