काठमाडौं । प्रमुख प्रतिपक्ष दल नेकपा (एमाले)का उपमहासचिव एवं सांसद पृथ्वीसुब्बा गुरुङले अख्तियार दुरुपयोग अनुसन्धान आयोगलाई अझ शक्तिशाली बनाउन सरकारसँग माग गरेका छन् ।

सबै निकायमाथि अनुसन्धानको कामलाई अघि बढाउन तथा मुलुकमा विद्यमान भ्रष्टाचार नियन्त्रण गरी सुशासन कायम गर्न पनि अख्तियारजस्ता नियमक निकायलाई अझै सशक्त र प्रभावकारी बनाउनुपर्ने उनको तर्क थियो ।

मंगलबार प्रतिनिधिसभाअन्तर्गतको राज्य व्यवस्था तथा सुशासन समितिको बैठकमा बोल्दै उनले राष्ट्रिय सुरक्षा र सीमासम्बन्धी ऐन बनाउन पनि राज्य व्यवस्था तथा सुशासन समितिले तत्काल पहल गर्नुपर्ने आवश्यकता औँल्याए । उपमहासचिव गुरुङले संविधानको मर्म र भावनाअनुसार सीमासम्बन्धी कानुन निर्माण गर्न सरकारले ढिलाइ गर्न नहुने बताए ।

“कि त अख्तियार अर्को शक्तिशाली चाहियो, कि त अख्तियार अझ शक्तिशाली बनाउनु प¥यो । त्यो बनाउने कुरामा पनि हाम्रो भूमिका हुन्छ,” उनले भने, “यो मुलुकमा भ्रष्टाचार नियन्त्रण गर्ने, सुशासन कायम गर्ने कुरामा यो संस्थालाई बलियो बनाउन आवश्यक छ ।”

उपमहासचिव गुरुङले सबै दलको एकतावद्ध प्रयासबाट मात्रै मुलुकको राज्य व्यवस्थालाई बलियो बनाउन सकिने पनि स्मरण गराए ।