काठमाडौं । झापा र मोरङमा भएका पछिल्ला सवारी दुर्घटनामा तीनजनाको मृत्यु भएको छ । आठजना घाइते छन् ।

बुधबार बेलुका करिब ७ बजे झापाको शिवसताक्षी नगरपालिका–१० कनकाई पुलस्थित पूर्वपश्चिम राजमार्गमा भएको दुर्घटनामा एकजनाको मृत्यु भएको छ । चारजना घाइते भएका छन् ।

पश्चिमबाट पूर्वतर्फ जाँदै गरेको को३१प ९५२९ नम्बरको मोटरसाइकले सोही दिशातर्फ जाँदै गरेको साइकललाई ठक्कर दिएको थियो । उक्त मोटरसाइकल अन्यत्रित भएर पुनः विपरीत दिशाबाट आउँदै गरेको मे३प ५४६३ नम्बरको मोटरसाइकलसँग ठोक्किएको थियो ।

दुर्घटनामा ५४६३ नम्बरका मोटरसाइकल चालक झापाकै भद्रपुर नगरपालिका–९ का ४० वर्षीय रुद्रप्रसाद न्यौपाने र त्यसमा पछाडि सवार बाह्रदर्शी गाउँपालिका–५ की १८ वर्षीया जेसिका सिक्देल गम्भीर घाइते भएका थिए । उपचारका लागि दुवैजनालाई बिर्तामोडस्थित बिर्तासिटी अस्पतालमा लगिएको थियो । घाइते जेसिकाको उपचारका क्रममा मृत्यु भएको हो । रुद्रप्रसादको उपचार भइरहेको कोसी प्रदेश प्रहरी कार्यालयले जनाएको छ ।

अर्को ९५२९ नम्बरको मोटरसाइकलका चालक दमक नगरपालिका–१ का ४० वर्षीय सुरेश राई र त्यसमा पछाडि सवार इलामको चुलाचुली नगरपालिका–४ की २९ वर्षीया निश्चल चेमजोङ समेत घाइते भएका छन् । बिर्तामोडस्थित बीएन्डसी अस्पतालमा उनीहरूको उपचार भइरहेको छ ।

सोही दुर्घटनामा साइकल चालक झापाकै अर्जुनधारा नगरपालिका–५ का ६३ वर्षीय गंगा तामाङ सामान्य घाइते भएका थिए । दुर्घटनामा परेका मोटरसाइकलहरू प्रहरीको नियन्त्रणमा छन् ।

मोटरसाइकल दुर्घटनामा एकजनाको मृत्यु, दुई घाइते
झापामै दुई मोटरसाइकल एकापसमा ठोक्किँदा एकजनाको मृत्यु भएको छ । दुईजना घाइते छन् । गए राति करिब पौने १ बजे बिर्तामोड नगरपालिका–३ स्थित पूर्वपश्चिम राजमार्गमा मे५प ५५६८ र प्र १–०१–०१३ प ५१४० नम्बरका मोटरसाइकल ठोक्किएका हुन् ।

दुर्घटनामा ५५६८ नम्बरका मोटरसाइकल चालक कनकाई नगरपालिका–५ का २६ वर्षीय सागर घिमिरे गम्भीर घाइते भएका थिए । उपचारका लागि बीएन्डसी अस्पतालमा पुर्‍याउनासाथ उनको मृत्यु भएको प्रहरीले जनाएको छ ।

अर्को ५१४० नम्बरका मोटरसाइकल चालक भद्रपुर नगरपालिका–१० का २९ वर्षीय सरोज बस्नेत र पछाडि सवार २८ वर्षीय सकिन न्यौपाने घाइते छन् । सोही अस्पतालमा उनीहरूको उपचार भइरहेको छ ।

ती दुवै मोटरसाइकल इलाका प्रहरी कार्यालय अनारमनीको नियन्त्रणमा छन् ।

दुई मोटरसाइकल ठोक्किँदा एकजनाको मृत्यु, दुई घाइते
मोरङमा दुई मोटरसाइकल एकापसमा ठोक्किँदा एकजनाको मृत्यु भएको छ । दुईजना घाइते छन् ।

केराबारी गाउँपालिका–१० स्थित भित्री सडकमा को२४प ६२७५ र प्र १–०२–०४८ प ३२३२ नम्बरका मोटरसाइकल ठोक्किएका हुन् । दुर्घटनामा ३२३२ नम्बरका मोटरसाइकल चालक सोही स्थानका ४० वर्षीय भीम देवान गम्भीर घाइते भएका थिए । विराटनगरस्थित न्युरो अस्पतालमा उपचारका क्रममा उनको मृत्यु भएको प्रहरीले जनाएको छ ।

अर्को ६२७५ नम्बरका मोटरसाइकल चालक केराबारी–२ का २५ वर्षीय साजन शाही घाइते छन् । विराटनगरस्थित गोल्डेन अस्पतालमा उनको उपचार भइरहेको छ ।

सोही दुर्घटनामा पैदलयात्री स्थानीय २५ वर्षीया केरुना रसाइलीलाई समेत घाइते भएकी छन् । स्थानीय मेडिकलमा उनको उपचार भइरहेको छ । ती दुवै मोटरसाइकल प्रहरीको नियन्त्रणमा छन् ।