काठमाडौं । एसिया कप २०२३ खेल्न पाकिस्तानमा रहेको नेपाली राष्ट्रिय क्रिकेट टिमलाई शुभकामना दिनेको ओइरो लागेको छ । 

बुधबार नेपाल र पाकिस्तानको खेल सुरु हुनुअघि नेपाली राष्ट्रिय टिमलाई काठमाडौंका मेयरदेखि राष्ट्रपतिसम्मले सामाजिक सञ्जालमार्फत शुभकामना दिएका छन् । 

राष्ट्रपति रामचन्द्र पौडेलले नेपाली राष्ट्रिय क्रिकेट टिमले एसिया कप २०२३ को यात्रा आरम्भ गर्दै पाकिस्तानसँग पहिलो खेलमा सहभागी हुन लागेकोमा सफलताको शुभकामना दिएका हुन् । 

यस्तै, प्रधानमन्त्री पुष्पकमल दाहाल ‘प्रचण्ड’ले बुधबार बिहान पाकिस्तानमा रहेको नेपाली टिमसँग भर्चुअल बैठक गर्दै जितका लागि शुभकामना व्यक्त गरेका थिए ।

शुभकामना व्यक्त गर्दै प्रधानमन्त्रीले प्रतियोगितामा नेपालले राम्रो नतिजा निकाल्ने विश्वास व्यक्त गरेका छन् । उनले खेल क्षेत्रको विकास र खेलाडीहरूको हितका निम्ति आफूले हमेसा ध्यान दिएकोसमेत जनाए ।

भर्चुअल बैठकमा नेपाली टिमका कप्तान रोहित पौडेलले टोलीले राम्रो तयारी गरिरहेको र त्यहीअनुसार प्रतिस्पर्धामा प्रस्तुति रहने प्रधानमन्त्रीलाई जानकारी दिएका थिए । 

प्रमुख प्रतिपक्षी दल नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले पनि सामाजिक सञ्जालमार्फत नेपाली राष्ट्रिय टिमलाई जितको लागि शुभकामना दिएका छन् ।

“र, प्रतिक्षाको घडी समाप्त भएको छ । नेपाली टिमले  आज पहिलो पटक एसिया कप खेल्दै छ । यसका लागि हामी सबै  नेपालीले लामो समयदेखि सपना देखेका थियौं । विश्वको नम्बर वान क्रिकेट टिम पाकिस्तानसँगको म्याचमा जितका लागि शुभकामना,” ओलीले भनेका छन् ।

परराष्ट्रमन्त्री एनपी साउदले उत्कृष्ट खेल प्रदर्शनका लागि नेपाली टिमलाई शुभकामना दिएका छन् ।

“नेपाली राष्ट्रिय क्रिकेट टिम आज पाकिस्तानी टिमसँगको खेलसँगै एसिया कप २०२३ को यात्रा प्रारम्भ गर्दै छ । एसिया कपमा पहिलो पटक सहभागिता जनाइरहेको नेपाली क्रिकेट टिमलाई हार्दिक बधाई तथा उत्कृष्ट खेल प्रदर्शनका लागि शुभकामना,” परराष्ट्रमन्त्री साउदले भनेका छन् । 

नेपाली कांग्रेसका महामन्त्री गगन थापाले नेपाली टिम विश्व क्रिकेटका महारथीहरूविरुद्ध मैदानमा उत्रेको हेर्न उत्साहित रहेको बताएका छन् ।

थापाले सामाजिक सञ्जालमा लेखेका छन्, “नेपाली राष्ट्रिय क्रिकेट टिमले आज पाकिस्तानको खेलसँगै एसिया कप २०२३ को यात्रा प्रारम्भ गर्नेछ । आजको खेल हाम्रा लागि यो संस्करणको मात्र नभएर लामो समयदेखि हामीले सपना देखेको ‘एसिया कप’ को यात्राकै पहिलो खेल हो । म हाम्रो टिम विश्व क्रिकेटका महारथीहरूविरुद्ध मैदानमा उत्रेको हेर्न उत्साहित छु ।”

राष्ट्रिय स्वतन्त्र पार्टीका अध्यक्ष रवि लामिछानेले आजको महत्वपूर्ण खेलका लागि नेपाली टोलीलाई शुभकामना व्यक्त गरेका छन् ।

“आजदेखि सुरु हुन गइरहेको एसिया कप क्रिकेट शृंखलाको उद्घाटन खेलमा नेपालले ओडीआईको वरीयतामा एक नम्बरमा रहेको पाकिस्तानसँग प्रतिस्पर्धा गर्दै छ । नेपाललाई अन्तर्राष्ट्रिय प्रतियोगितामा पु¥याउन योगदान गर्नुहुने सम्पूर्ण खेलाडी, प्रशिक्षक र सरोकारवालाहरूप्रति कृतज्ञता र आजको महत्त्वपूर्ण खेलका लागि नेपाली टोलीलाई हार्दिक शुभकामना,’ लामिछानेले भनेका छन् । 

काठमाडौं महानगरपालिकाका प्रमुख बालेन्द्र शाहले नेपाली राष्ट्रिय टिमले नेपाली सबैलाई गर्व गर्ने ठाउमा पु¥याएको  बताएका छन् ।

“टिभीमा सोएब अख्तर, शाहीद अप्रिदी, बाबर आजम, शाहीन अप्रिदीहरूको खेल हेरेर रमाइन्थ्यो । विश्वकप विजेताहरूको देश र वरीयतामा उपल्लो क्रममा रहेका खेलाडी भएको टिमले सधै रोमाञ्चकता दिन्थ्यो,” काठमाडौं महानगरका प्रमुख शाहले फेसबुकमा लेखेका छन् ।

नेपाल समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्राईले पनि नेपाली क्रिकेट टिमलाई सफलताको शुभकामना दिएका छन् ।