काठमाडौं । चीनले भारतको अरुणाचललाई समेटेर आफ्नो नयाँ नक्सा जारी गरेको छ । चीनले सोमबार जारी गरेको नयाँ नक्सामा भारतको अरुणाचल पनि समेटिएको हो ।

सोमबार जारी गरिएको नक्सालाई चीनले ‘स्ट्यान्र्डड म्याप’ बताएको छ । नक्सामा अरुणाचल प्रदेश र अक्साई चीनलाई फेरि एकपटक चीनको हिस्सा देखाइएको छ ।

नयाँ नक्सामा दक्षिणी चीन सागर र ताइवानलाई पनि चीनको हिस्सा देखाइएको छ । चिनियाँ कम्युनिस्ट पार्टीको मुखपत्र मानिने अंग्रेजी दैनिक ग्लोबल टाइम्सले नयाँ नक्सा सार्वजनिक गरेको हो ।

सामाजिक सञ्जालमा नयाँ नक्सा सार्वजनिक गर्दै ग्लोबल टाइम्सले लेखेको छ, “चीनको २०२३ को स्ट्यान्डर्ड म्याप सोमबार जारी भएको छ । यो नक्सा प्राकृतिक स्रोत मन्त्रालयको वेबसाइटमा लन्च गरिएको हो । यो नक्सा चीन र विश्वका अन्य देशको ‘ड्रोइङ्ग मेथड’को आधारमा बनाइएको हो ।”

ब्रिक्स सम्मेलनमा चिनियाँ राष्ट्रपति सी चिनफिङ र भारतीय प्रधानमन्त्री नरेन्द्र मोदीबीच भेटवार्ता भएको केही दिनपश्चात् चीनले उक्त नक्सा सार्वजनिक गरेको हो । भेटमा दुई देशका नेताले सीमा विवादका विषयमा पनि छलफल गरेका थिए ।

यसअघि, अप्रिल २०२३ मा चीनको नागरिक मामिलासम्बन्धी मन्त्रालयले अरुणाचल प्रदेशका ११ स्थानको नाम परिवर्तन गर्न अनुमति दिएको थियो ।

चीनले अरुणाचल प्रदेशको ९० हजार वर्ग किलोमिटर जमिन आफ्नो भएको दाबी गर्दै आएको छ । चीनले अक्साई चीनको ३८ हजार वर्ग किलोमिटर क्षेत्रमा कब्जा जमाएको आरोप भारतले पनि लगाउँदै आएको छ ।