संखुवासभा । संखुवासभाको कारागारभित्र दुई कैदीको हत्या प्रकरणमा प्रहरीसहित १२ जनामाथि अनुसन्धान थालिएको छ । कैदीको हत्या प्रकरणमा प्रहरी र कैदी अनुसन्धानमा तानिएका हुन् ।

सीसीटीभी फुटेज अध्ययनबाट घटनामा प्रहरी र चौकीदारसहित केही कैदीको संलग्नताले देखिएको थियो । कैदी मृत्यु प्रकरणमा प्रहरीसहित १२ जना अनुसन्धानको दायरामा तानिएको जिल्ला प्रहरी कार्यालय संखुवासभाका प्रहरी नायब उपरीक्षक वीरेन्द्र गोदारले जानकारी दिए ।

घटनामा संलग्न देखिएका प्रहरी र कैदीमाथि म्याद थप गरेर अनुसन्धान भइरहेको प्रहरी उपरीक्षक गोदारले बताए । कैदी मृत्यु प्रकरणमा प्रत्यक्ष संलग्न देखिएका पाँच प्रहरीलाई विभागीय कारबाहीका लागि सिफारिस गरिएको उनले जानकारी दिए ।

गएको साउन २८ गते कारागार सुरक्षा इन्चार्ज एवं प्रहरी सहायक निरीक्षक (असई) लक्ष्मी चौधरीविरुद्ध पाँच दिन म्याद थप गरेर प्रहरीले अनुसन्धान गरिरहेको थियो । असई चौधरीविरुद्ध शुक्रबार पुनः पाँच दिन म्याद थप गरिएको छ । अरू ११ जनाविरुद्ध पहिलो म्याद थप गरिएको जिल्ला प्रहरी कार्यालय संखुवासभाले जनाएको छ ।

घटनामा संलग्नविरुद्ध छानबिन टोलीको प्रतिवेदनका आधारमा थप कारबाही प्रक्रिया अघि बढाइने प्रहरी नायब उपरीक्षक गोदारले बताए ।

घटनापछि गृह मन्त्रालयले कारागार विभागका निर्देशक कमलप्रसाद पाण्डेको नेतृत्वमा पाँच सदस्यीय अनुसन्धान टोली बनाएको थियो । पीडितले दिएको किटानी जाहेरीका आधारमा सहायक निरीक्षक चौधरीसहित कारागारका निमित्त प्रमुख राजेन्द्र घिमिरेविरुद्ध जिल्ला अदालत संखुवासभाले साउन २८ गते पक्राउका लागि अनुमति दिएको थियो ।

प्रहरीले घटनालगत्तै कारागार सुरक्षामा खटिएका १० प्रहरी र चौकीदार तथा नौ कैदीलाई नियन्त्रणमा लिएको थियो । कारागारका निमित्त प्रमुख घिमिरेलाई भने हालसम्म पक्राउ गरिएको छैन ।

कुटपिटबाट संखुवासभाकै मादी नगरपालिका–५ का २० वर्षीय विनोद तोलांगी र नुवाकोटको ककनी गाउँपालिका–७ का २८ वर्षीय आकाश बलामीको साउन २४ गते बिहान मृत्यु भएको थियो । २५ जनाको क्षमता रहेको कारागारमा अहिले १३६ कैदीबन्दी छन् । रासस