काठमाडौं । श्रम, रोजगार तथा सामाजिक सुरक्षामन्त्री शरत्सिंह भण्डारीले शैक्षिक परामर्श संस्थाहरुले म्यानपावरको काम गरिरहेको बताएका छन् । शुक्रबार मन्त्रालयमा आयोजना भएको ‘एकीकृत श्रम व्यवस्थापन सूचना प्रणाली’ (लेमिस) शुभारम्भ कार्यक्रममा बोल्दै मन्त्री भण्डारीले यस्तो बताए ।

विदेशमा अध्ययनको लागि जानेहरुलाई शैक्षिक परामर्श दिने संस्थाहरुले मेनपावरको काम गरेको भन्दै उनले असन्तुष्टि जनाए । मेनपावरले गर्ने काम शैक्षिक परामर्श संस्थाहरुले गर्न नहुने भन्दै मन्त्री भण्डारीले उक्त विषयमा श्रम मन्त्रालय र सरकारको गम्भीर ध्यानाकर्षण भएको बताए ।

वैदेशिक रोजगारमा गएर अलपत्र पर्नेहरुमा ९० प्रतिशत मानिस भिजिट भिसा र व्यक्तिगत भिसामा गएका रहेको पनि उनले उल्लेख गरे । मन्त्री भण्डारीले वैदेशिक रोजगारमा संस्थागत हिसाबमा जाने नेपालीहरु अलपत्र नपरेको दाबी गरे ।

पछिल्लो समय युद्धरत देशहरुमा पनि नेपालीहरु गएको अवस्था देखिरहेको भन्दै मन्त्री भण्डारीले युद्धरत देशमा कसरी नेपालीहरु पुगे भन्ने विषयमा सरकार गम्भीर रहेको बताए । उनले यस्तो अनियमित कामलाई नियमित गरी गलत गर्नेलाई कारबाही गर्ने गरी सरकार अगाडि बढेको बताए ।

मन्त्री भण्डारीले मधेसका कतिपय नागरिकलाई कुन देश कहाँ हो भन्ने थाहा नभएको भन्दै उनीहरुलाई गाउँघरकै मानिसहरुले काठमाडौंमा ल्याएर छोड्ने र काठमाडौंमा ठगेर बस्ने गरिरहेको बताए ।

“वैदेशिक रोजगारमा गएर अलपत्र पर्नेहरुमा अधिकांश ९० प्रतिशत मानिस भिजिट भिसा र व्यक्तिगत भिसामा गएका छन् । संस्थागत हिसाबमा गएकाहरु यसरी अलपत्र परेका छैनन्,” उनले भने, “युद्धरत देशहरुमा पनि नेपालीहरु गएको अवस्था देखिरहेको छ । यसबारेका अनियमितलाई नियमित गरी गलत गर्नेलाई कारबाही गर्ने गरी हामी अघि बढेका छौँ ।”

श्रममन्त्री भण्डारीले स्वदेशको श्रम क्षेत्रमा देखिएका विद्यमान समस्या र त्यसको समाधानका लागि अनलाइन प्रणाली निकै प्रभावकारी हुने बताए । सरकारले पारिश्रमिक नपाउने तथा कम पाउने समस्या विद्यमान रहेको भन्दै उनले अब अनलाइनमार्फत नै उजुरी गरेको खण्डमा तत्काल कारबाही गर्न सजिलो हुने दाबी गरे ।

शुक्रबारदेखि श्रम तथा व्यवसायजन्य सुरक्षा विभागका सम्पूर्ण क्रियाकलाप अनलाइन प्रणालीमार्फत भएका छन् । विभागले प्रवाह गर्दैै आएको सेवा शुक्रबारदेखि एकीकृत श्रम व्यवस्थापन सूचना प्रणाली (लेमिस)मार्फत हुने भएको हो ।