काठमाडौं । नेपाल विद्युत् प्राधिकरणको ग्राहक संख्यामा वृद्धि भएको छ । प्राधिकरणको ३८औँ वार्षिकोत्सवको अवसरमा निर्देशक कुलमान घिसिङले सार्वजनिक गरेको प्रतिवदेनमा आर्थिक वर्ष (आव) २०७९/८० मा ७.७६ प्रतिशत ग्राहक बढेको उल्लेख छ । 

आव २०७८/७९ मा ४७ लाख ७० हजार ग्राहक रहेकोमा आव २०७९/८० मा ७.७६ प्रतिशले बढेर ५१ लाख ३० हजार पुगेको प्रतिवेदनमा जनाइएको छ । सामुदायिक ग्रामीण विद्युतीकरणबाट विद्युत् सेवा उपभोग गरिरहेका पाँच लाख १० हजार ग्राहकसहित राष्ट्रिय ग्रिडबाट विद्युत् सेवा उपभोग गर्ने ग्राहकको संख्या ५६ लाख ४० हजार पुगेको छ ।

प्राधिकरणका अनुसार हाल राष्ट्रिय ग्रिडको पहुँचबाट ९५ प्रतिशत र साना तथा लघु जलविद्युत आयोजना एवं सौर्य विद्युत्बाट ३ प्रतिशत गरी जम्मा ९८ प्रतिशत जनताले विद्युत् सेवा प्राप्त गरिरहेका छन् । आगामी दुई वर्षभित्र सबै जनतालाई विद्युत्को पहुँच पुऱ्याउने गरी वितरण प्रणाली निर्माण कार्य अगाडि बढाइएको घिसिङले बताएका छन् । 

ग्राहको संख्या बढेपनि विद्युत् उत्पादन भने घटेको छ । गत वर्ष सुक्खा याममा नदीहरूमा जलप्रवाहको स्तर घटेकाले प्राधिकरणको जलविद्युत् गृहहरूबाट कुल दुई अर्ब ९३ करोड युनिट विद्युत् उत्पादन भएको प्रतिवेदनमा उल्लेख ५छ । जुन आव २०७८/७९ को तुलनामा १०.१० प्रतिशतले कम हो ।

प्राधिकरणले भारतबाट गत आवमा एक अर्ब ८३ करोड युनिट विद्युत् आयात गरिएको छ । जुन आव २०७८/७९ को तुलनामा १८.७९ प्रतिशतले बढी रहेको घिसिङको प्रतिवेदनमा उल्लेख छ । 

आव २०७८/७९ को तुलनामा आव २०७९/८० मा विद्युत् खपत ५.५० प्रतिशतले वृद्धि भई ९ अर्ब ३५ करोड युनिट पुगेको छ ।

प्रणालीको विद्युत चुहावट आव २०७९/८० मा १३.४६ प्रतिशतमा रहेको छ । जुन आव २०७८/७९ को तुलनामा १.९२ अङ्कले कमी हो । प्राधिकरणको इतिहासमा यो नै अहिलेसम्मको कम चुहावट भएको घिसिङको भनाइ छ । 

प्राधिकरणको नाफा पनि कमी आएको छ । स्वदेशी जलविद्युत गृहहरूबाट विद्युत उत्पादन घट्न गएकाले आयातित विद्युत ऊर्जाको परिमाण बढ्न जाँदा आव २०७९/८० मा प्राधिकरणको खुद नाफा आव २०७८/७९ तुलनामा ७.७६ प्रतिशले कमी आई १२ अर्ब ३३ करोड हुन गएको जनाइएको छ ।