काठमाडौं । अख्तियार दुरुपयोग अनुसन्धान आयोगले सप्तरीको विष्णुपुर गाउँपालिकामा कार्यरत लेखापाल टेकनारायण यादवलाई घुस रकमसहित नियन्त्रणमा लिएको छ ।

इटहरीस्थित अख्तियारको कार्यालयबाट खटिएको टोलीले यादवलाई सेवाग्राहीसँग दुई लाख रुपैयाँ घुस लिइसकेको अवस्थामा उक्त रकमसहित बुधबार पक्राउ गरेको हो ।

लेखापाल यादवको साथमा एम.आई.एस. अपरेटर वीरेन्द्रकुमार यादवलाई पनि नियन्त्रणमा लिइएको अख्तियारका प्रवक्ता भोला दाहालले जानकारी दिए ।

"लेखापाल टेकनारायण यादव र एम.आई.एस. अपरेटर वीरेन्द्रकुमार यादवलाई सेवाग्राहीबाट नगद दुई लाख रुपैयाँ घुस बापतको रकम लिइसकेको अवस्थामा उक्त रकम र तीन लाख रुपैयाँको चेकसहित राजविराज नगरपालिका–३, त्रिभुवन चोकबाट साउन ३१ गते नियन्त्रणमा लिई थप अनुसन्धान भइरहेको छ," अख्तियारले बुधबार जारी विज्ञप्तिमा उल्लेख गरिएको छ ।